ۇلتتىق بانك باسشىسى تەڭگەگە قول قويمايدى

استانا. قازاقپارات - قازاقستاننىڭ ۇلتتىق ۆاليۋتاسى - تەڭگەدە ەندى ۇلتتىق بانك ءتوراعاسىنىڭ قولى بولمايدى.

مەملەكەت باسشىسى وسى جونىندە ءتيىستى وزگەرىس ەنگىزدى. رەسمي قۇجات قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ اقپاراتتىق- قۇقىقتىق جۇيەسى سايتىندا جاريالاندى.

«قازاقستان رەسپۋبليكاسىنىڭ ۇلتتىق بانكى تۋرالى» 1995 -جىلعى 30 -ناۋرىزداعى قازاقستان رەسپۋبليكاسى زاڭىنىڭ 3-بابىنا سايكەس قاۋلى ەتەمىن: «ۇلتتىق ۆاليۋتا - قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2003 -جىلعى 25 -قىركۇيەكتەگى № 1193 -جارلىعىنا (قازاقستان رەسپۋبليكاسىنىڭ پ ءۇ ا ج- ى، 2003 ج. , № 38, 384-قۇجات؛ 2008 ج. , № 31, 309-قۇجات؛ 2014 ج. , № 3, 16-قۇجات) مىناداي وزگەرىس ەنگىزىلسىن:

جوعارىدا اتالعان جارلىقپەن بەكىتىلگەن ۇلتتىق ۆاليۋتا - قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىندا:

13-1-تارماق الىپ تاستالسىن» ، دەلىنگەن جارلىق ماتىنىندە.

ەسكە سالا كەتسەك، مەملەكەت باسشىسى «ۇلتتىق ۆاليۋتا - قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىن بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2003 -جىلعى 25 -قىركۇيەكتەگى № 1193 -جارلىعىنا وزگەرىس ەنگىزگەن بولاتىن.

2016 -جىلدىڭ 28 -قاڭتارىنداعى قازاقستان پرەزيدەنتىنىڭ جارلىعى قول قويىلعان كۇنىنەن باستاپ قولدانىسقا ەنگىزىلەدى.