يسپانيادا سۋ استىنداعى مۇسىندەر مۇراجايى اشىلدى - كەسكىن

استانا. قازاقپارات - ەۋروپادا دايۆەرلەر جانە تەڭىز جانۋارلارى عانا كورە الاتىن العاشقى سۋ استى مۇراجايى اشىلدى.

يسپانيانىڭ لانساروتا ارالىنىڭ جاعالاۋىندا، لاس- كولورادوس شىعاناعىندا دجەيسون دە كەيرەس تەيلور جاساعان مۇسىندەردى ورناتۋ باستالدى. ونىڭ تۋىندىلارى ەكولوگيالىق تازا بەتوننان جاسالعان، ولار كۇندەلىكتى ومىردەگى كورىنىستەردى بەينەلەپ، مۇحيت پروبلەمالارى تۋرالى اقپاراتتاندىرۋعا باعىتتالعان.

12-15 مەتر تەرەڭدىكتە ورناتىلاتىن ادامداردىڭ تىلسىم كەيىپتەگى مۇسىندەرى جاساندى ءريفتىڭ ءبىر بولىگىنە اينالىپ، سول ماڭداعى سۋ استى ەكوجۇيەسىنىڭ دامۋىنا سەپتىگىن تيگىزەدى دەپ كۇتىلۋدە.

مۇسىندىك كومپوزيتسيالاردىڭ ءبىرى «كونتەنت» دەپ اتالعان، ول سۋ استىندا سەلفي جاساپ جاتقان جۇپتى بەينەلەيدى. ەكىنشى مۇسىندىك توپ، «رۋبيكون» سۋ استىندا كەلە جاتقان 35 «ادامنان» تۇرادى. ءۇشىنشى توپ، «لامپەدۋزا سالى»، قايىقتاعى بوسقىنداردى بەينەلەيدى. بارلىعى «Museo Atlántico» دەپ اتالادى.

مۇسىندەردى سۋ استىنا ءتۇسىپ نەمەسە تۇبىنەن سۋ استى كورىنەتىن قايىقتارعا ءمىنىپ تاماشالاۋعا بولادى. جوبانىڭ قۇنى 700 مىڭ ەۋروعا باعالانۋدا، دەپ جازادى The Local باسىلىمى.

بۇعان دەيىن دە كەيروس تەيلور وسىعان ۇقساس مۇراجايلاردى باگام ارالدارىندا اشىپ، سونداي-اق گرەنادا جاعالاۋىنا جاقىن جەردە، كاريب تەڭىزىنىڭ تۇبىنە بىرەۋىن ورنالاستىرعان.