الماتى پوليتسياسى بىرنەشە پاتەر توناعان ۇرىنى قولعا ءتۇسىردى - فوتو
36 جاستاعى وزبەكستان ازاماتى پاتەرلەردەن توندار، كۇرتكەلەر، اياق كيىمدەر، اسحانالىق ىدىس- اياقتار، قۇرىلىسقا ارنالعان قۇرال- سايماندار، ماي رادياتورىن، توسەك- ورىن جايماسىن، قاراكۇزەن قالپاق، ءتىپتى بەسىككە دەيىن ۇرلاعان. ياعني، جەڭىل تابىسقا قۇنىققان وزبەكستاندىق قاسكۇنەم پاتەردە قولىنا تۇسكەننىڭ بارلىعىن جىمقىرىپ وتىرعان.
«كۇدىكتىنى ءبىز مۇلىكتىك قىلمىستىڭ جولىن كەسۋگە باعىتتالعان كەشەندى شارا بارىسىندا انىقتادىق. سوڭعى ۋاقىتتا الماتىنىڭ كوتتەدجدىك قالاشىقتارىندا پاتەر توناۋ وقيعالارى كوبەيىپ كەتتى.
كۇدىكتى پاتەرگە كۇندىز، ءۇي يەلەرى جوق كەزدە تۇسەتىن بولعان. العاشقى كۇنى جۇرگىزىلگەن پروتسەسسۋالدىق ارەكەتتىڭ ارقاسىندا كۇدىكتىنىڭ تەك ءبىزدىڭ اۋداننىڭ اۋماعىندا بولعان بەس قىلمىسقا قاتىسى بار ەكەندىگى انىقتالدى. ۇرلانعان زاتتاردىڭ ارتۇرلىلىگىنە قاراپ، ۇرىنىڭ باسقا دا اۋدانداردا توناۋشىلىقپەن اينالىسۋ مۇمكىندىگىن جوققا شىعارۋعا بولمايدى. ال زاتتاي ايعاقتار، ونىڭ «قالقامان» ىقشاماۋدانىنداعى جالعا الىپ تۇرىپ جاتقان پاتەرىنەن تابىلدى. بۇل جەردە ول ايەلى جانە ەكى بالاسىمەن تۇرىپ كەلگەن»، - دەدى ناۋرىزباي اۋداندىق ءىىب باستىعى، پوليتسيا پولكوۆنيگى مۇحيت شايحين.
پوليتسيا قىزمەتكەرلەرى پروتسەسۋالدىق ارەكەتتەردى جان-جاقتى جۇرگىزۋ ماقساتىندا كۇدىكتىدەن تاركىلەنگەن زاتتاردى كوپشىلىك نازارىنا ۇسىندى. كەيبىرەۋلەر ءوز زاتتارىن تانۋى ابدەن مۇمكىن.
اۆتور: جاپپاربەرگەن ايبوتا
