الماتى وبلىسىندا تىكۇشاق اپاتىنان قازا تاپقان دارىگەرلەر مەملەكەتتىك ماراپاتقا ۇسىنىلادى

استانا. قازاقپارات - الماتى وبلىسىندا تىكۇشاق اپاتىنان قازا بولعان دارىگەر-گەماتولوگ باقىتگۇل قايسانوۆا مەن فەلدشەر گۇلنۇر حاميتوۆا وبلىستىق دەنساۋلىق ساقتاۋ باسقارماسى تاراپىنان مەملەكەتتىك ماراپاتقا ۇسىنىلاتىن بولدى.

سونداي-اق قازا بولعان مەديتسينا قىزمەتكەرلەرىنىڭ جانۇيالارىن باسپانامەن قامتۋ جاعى قاراستىرىلىپ جاتىر دەپ حابارلايدى 31- ارنا.

ۇسىنىس وبلىس اكىمى اماندىق باتالوۆقا جولداندى. اكىمدىك قولداعان جاعدايدا ەتجاقىندارى باسپانالى بولادى. سەبەبى، 25 جىلدان استام ەڭبەك ەتىپ، وبلىس بويىنشا بالالاردىڭ جالعىز دارىگەر-گەماتولوگى بولىپ قىزمەت اتقارعان مارقۇم باقىتگۇل قايسانوۆا مەن فەلدشەر گۇلنۇر حاميتوۆا دا جالدامالى پاتەردە تۇرىپ كەلگەن.

قيىن ساتتە وزگەنىڭ ءومىرى ءۇشىن كۇرەسىپ، وزدەرى قۇربان بولعان اق حالاتتىلاردىڭ ارىپتەستەرى دە ولاردىڭ تۋىستارىنا قول ۇشىن سوزۋدا.

«باسپانامەن قامتۋ نەمەسە قارجىلاي قولداۋ كورسەتۋ جاعى قاراستىرىلاتىن بولادى. ەڭ باستىسى وبلىس باسشىسى باستامامىزدى قولداپ وتىر. جالپى قايعىلى جاعدايعا بايلانىستى وبلىستاعى مەديتسينا سالاسىنىڭ قىزمەتكەرلەرى 2 ارىپتەسىمىزگە 4 ميلليون تەڭگە كولەمىندە قارجىلاي قولداۋ كورسەتتى»، - دەيدى الماتى وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ.