بايلىعىن جاسىرعان اۋقاتتىلار جازالاناتىن بولادى

استانا. قازاقپارات - بايلىعىن جاريا ەتۋگە جاسقانعان نەمەسە شەتەلگە اسىرعان اۋقاتتىلارعا تىقىر تاياندى. سەبەبى مۇلىكتى زاڭداستىرۋعا رۇقسات بەرىپ، راقىمشىلىق جاساۋدىڭ ارتىندا جازالاۋ شاراسى تۇر.

 ارينە، ناۋقانعا قاتىسپاعان، تابىسىن جاسىرعاندار ءۇشىن. شەتەل اسقان قارجىنى ەلگە قايتارۋدىڭ ءتۇرلى جولدارىن ىزدەگەن بيلىك، زاڭداستىرۋ ناۋقانى اياقتالا سالىسىمەن جالپىعا بىردەي دەكلاراتسيانى ەنگىزبەك. تابىس دەكلاراتسياسىنىڭ جاي- جاپسارىنا جاراس نيازبەك ءۇڭىلىپ كوردى.

بەكەن تولەۋجان ۇلى 17  جىلدان بەرى جەكە تابىس دەكلاراتسياسىن تاپسىرىپ جۇرگەن مەملەكەتتىك قىزمەتكەر. سالىق سالاسىنىڭ مامانى وزگەلەردى دە وسىعان ۇندەيدى. ال 2017 -جىلدان باستاپ ەنەتىن جالپىعا بىردەي دەكلاراتسيا مۇلىكتى جاسىرىپ قالۋعا مۇمكىندىك بەرمەيدى. تۋىستاردىڭ اتىنا جازىلعان دۇنيە مۇلىكتى ءوز اتىنا تىركەۋگە جىل سوڭىنا دەيىن ۋاقىت بەرگەن ارنايى زاڭ شەتەلدەگى قارجىنى جاريالاۋعا دا كوپ جەڭىلدىك جاساپتى.

بەكەن نۇراحمەتوۆ، الماتى قالالىق مەملەكەتتىك كىرىستەر دەپارتامەنتىنىڭ ءبولىم باسشىسى:

- جاريا ەتىلگەن مۇلىك بولاشاقتا قىلمىستىق جاعدايعا تارتىلعاندا، اكىمشىلىك جاۋاپقا تارتىلعاندا جانە تارتىپتىك جاۋاپكەرشىلىككە تارتىلسا جاريا ەتىلگەن مۇلىك ادامدى جازالاۋ شاراسى رەتىندە نەگىزگە الىنبايدى. سوندىقتان سوتتىڭ ۇكىمىمەن بۇل تاركىلەۋگە جاتپايدى.

ال دۇنيە مۇلىكتى جاسىرىپ قالساڭىز، ءتىپتى، شەتەلدە جاتقان قارجىڭىز بەن بايلىعىڭىزدى تابۋ زاڭ ورىندارى ءۇشىن ەش قيىندىق تۋدىرمايدى ەكەن. سەبەبى قازاقستان ستراسبۋرگ كونۆەنتسياسىنا مۇشە ەل. اۋەلى ايىپپۇل سالىنسا، كەيىننەن تاركىلەنۋى مۇمكىن. سوندىقتان اۋقاتتىلار مۇلكىن جاريالاپ، دۇنيەسىن زاڭداستىرۋعا اسىعۋدا. 2015 -جىلعى زاڭداستىرۋ ناۋقانىندا الماتى قالاسى بويىنشا 808 ميلليون تەڭگەنىڭ مۇلكى جاريالانعان. ال تاعى ءبىر جىلعا سوزىلعان زاڭداستىرۋدىڭ العاشقى ايىندا بۇل كورسەتكىش 42 ەسەگە ارتىپ، 34 ميلليارد تەڭگەگە جەتىپتى. دەسە دە ساياساتكەر ءامىرجان قوسانوۆ "باي- باعلانداردىڭ بيلىككە سەنىمى ارتسا، جاريا بولاتىن قارجى كولەمى وراسان بولار ەدى" دەگەن پىكىردە. ال دەكلاراتسيانى جالپىلاۋعا حالىق دايىن ەمەس دەيدى.

ءامىرجان قوسانوۆ، ساياساتكەر:

- سالىق تولەۋدەن قاشىپ جۇرگەن بايلار وزدەرىنىڭ مۇلكىن تومەن دارەجەلى تۋىستارىنا، تانىستارىنا جازىپ قويۋى مۇمكىن. وسىلاي سالىقتان قاشۋى مۇمكىن. بۇل تۇرعىدان العاندا جالپىعا بىردەي دەكلاراتسيا ساتىلاپ، بىرتىندەپ قوعامعا ەنۋى كەرەك. ءبىراق ول ءۇشىن ەلدىڭ دە ءال- اۋقاتى، داۋلەتى، تابىسى ءوسۋ كەرەك.

مامانداردىڭ ايتۋىنشا، 2017 -جىلدان باستالاتىن جالپىعا بىردەي دەكلاراتسيانىڭ ەنگىزىلۋى كەزەڭ كەزەڭىمەن جۇزەگە اسادى. اۋەلى مەملەكەتتىك قىزمەتكەرلەر تابىس دەكلاراتسياسىن تاپسىرۋعا مىندەتتەلسە، ارتىنشا بيۋدجەتتىك سالا ماماندارى زاڭعا باعىنۋى ءتيىس. سودان كەيىن قاراپايىم حالىق جىل سايىن تابىس دەكلاراتسياسىن وتكىزەدى. الايدا جالپىعا بىردەي دەكلاراتسيانىڭ ناقتى تەتىكتەرى بەلگىلەنبەگەن.

31.kz