قازاقستان تاتامي شەبەرلەرىنە وليمپيادا ويىندارىنىڭ ۇپايلارى ۇلەستىرىلەتىن توعىز باسەكەنىڭ ءبىرى الماتىدا وتەدى
بۇل تۋرالى قر مادەنيەت جانە سپورت مينيسترلىگىنىڭ باسپا ءسوز قىزمەتى حابارلادى.
الاتاۋ بوكتەرىندە وتەتىن بۇل دودانىڭ باستى ەرەكشەلىگى - دزيۋدوشىلار ءۇشىن ريو-دە جانەيرو وليمپياداسىنىڭ الدىنداعى قاجەتتى ۇپايلارىن قورجىنعا باساتىن ماڭىزدى جارىستاردىڭ ءبىرى.
كەشە بۇل بايراقتى باسەكەنى وتكىزۋگە نەگىزدەلگەن جۇمىس توبىنىڭ العاشقى وتىرىسى ءوتتى. ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى ءتوراعاسىنىڭ مىندەتىن اتقارۋشى سەرىك جاراسبايەۆتىڭ توراعالىعىمەن وتكەن جۇمىس توبىنىڭ وتىرىسىندا ناقتى جوسپار بەكىتىلىپ، جاۋاپتى تۇلعالار بەلگىلەندى.
قازىر وليمپيادا ويىندارىنا جولداما بەرىلەتىن جارىسقا قازاقستان ۇلتتىق قۇراماسى قىزۋ دايىندىق ۇستىندە.
ەستەرىڭىزگە سالا كەتەيىك، قازاقستان دزيۋدوشىلارى وسىعان دەيىن وليمپيادا ويىندارىندا تەك ءبىر عانا مەدال (كۇمىس) الدى. ونى 2008-جىلى بەيجىڭ وليمپياداسىندا اسحات جيتكەيەۆ قورجىنىمىزعا سالعان بولاتىن. لوندوندا دزيۋدوشىلارىمىزدىڭ باعى جانبادى. ەندى ريو وليمپياداسىنا ۇمىتپەن قارايمىز.
قازاقستان دزيۋدو فەدەراتسياسى رەسمي سايتى ەلىمىزدىڭ دزيۋدوشىلارى وليمپيادا ويىندارىنا دەيىن توعىز جارىستا باقتارىن سىنايتىنىن جازدى. ولار:
«Grand Slam» (پاريج، 6-7- اقپان)
«Grand Prix» (ديۋسسەلدورف، 19-21- اقپان)
«European Open» (پراگا، 27-28- اقپان)
«Grand Prix» (تبيليسي، 25-27- ناۋرىز)
«Grand Prix» (سامسۋن، 1-3- ءساۋىر)
ازيا چەمپيوناتى (تاشكەنت، 15-17- ءساۋىر)
«Grand Slam» (باكۋ، 6-8- مامىر)
«Grand Prix» (الماتى، 13-15- مامىر)
«Masters» (گۆادالاحارا، 27-29- مامىر)
بۇل تۋرنيرلەردىڭ ىشىندە ەڭ كوپ ۇپاي بەرىلەتىنى - Masters جانە Grand Slam تۋرنيرلەرى. دەمەك، الدا ءالى ناعىز باسەكە كۇتىپ تۇر.
كۇنسۇلتان وتارباي
