قازاقستاندا ەلەكتروندى ساۋدادا باعالاردى تەڭگەمەن بەلگىلەۋ ەرەجەلەرى بەكىتىلدى

استانا. قازاقپارات - قازاقستان رەسپۋبليكاسى ۇلتتىق ەكونوميكا مينيسترلىگى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» 2015-جىلعى 27- قازانداعى قازاقستان رەسپۋبليكاسىنىڭ زاڭىن ىسكە اسىرۋ ماقساتىندا قازاقستان رەسپۋبليكاسى ۇلتتىق ەكونوميكا ءمينيسترىنىڭ مىندەتىن اتقارۋشى مارات قۇسايىنوۆتىڭ «ەلەكتروندىق ساۋدانى جۇزەگە اسىرۋ قاعيدالارىن بەكىتۋ تۋرالى» 2015-جىلعى 25- قاراشاداعى 720№ بۇيرىعى بەكىتىلدى.

بۇيرىقتا ەلەكتروندىق ساۋدا، ەلەكتروندىق ساۋداعا قاتىسۋشىلار (ساتۋشى، ساتىپ الۋشى جانە دەلدال) تۇسىنىكتەرى ەنگىزىلگەن، سونىمەن قاتار ەلەكتروندىق ساۋدانى جۇزەگە اسىرۋ ءتارتىبى ايقىندالعان.

بۇل رەتتە ەلەكتروندىق ساۋداداعى دەلدال:

1) ەلەكتروندىق قۇجاتتاردا (ەلەكتروندىق حابارلامالاردا) قامتىلعان اقپاراتتى جاريا ەتپەيدى؛

2) ەگەر ەلەكتروندىق ساۋدانىڭ باسقا قاتىسۋشىلارىمەن جاساسقان شارتتا نەمەسە قازاقستان رەسپۋبليكاسىنىڭ زاڭدارىندا وزگەشە كوزدەلمەسە، ەلەكتروندىق قۇجاتتاردى (ەلەكتروندىق حابارلامالاردى) نەمەسە ولاردىڭ كوشىرمەلەرىن، ونىڭ ىشىندە ولارداعى قامتىلعان اقپاراتتى ءۇشىنشى تۇلعالارعا بەرمەيدى؛

3) ەگەر ەلەكتروندىق ساۋدانىڭ باسقا قاتىسۋشىلارىمەن جاساسقان شارتتا نەمەسە قازاقستان رەسپۋبليكاسىنىڭ زاڭدارىندا وزگەشە كوزدەلمەسە، ەلەكتروندىق قۇجاتتاردى (ەلەكتروندىق حابارلامالاردى) نە ولاردى پايدالانۋ ءتارتىبىن وزگەرتپەيدى؛

4) تاۋارعا باعانى تەك ۇلتتىق ۆاليۋتادا بەكىتۋدى قامتاماسىز ەتەدى.

ەلەكتروندىق ساۋدانى جۇزەگە اسىرۋ قاعيدالارى قازاقستان رەسپۋبليكاسىنىڭ «ساۋدا قىزمەتىن رەتتەۋ تۋرالى» 2004-جىلعى 12- ساۋىردەگى زاڭىنا سايكەس ازىرلەندى جانە ەلەكتروندىق ساۋدانى جۇزەگە اسىرۋ ءتارتىبىن ايقىندايدى.