بۇگىن - ءابدىلدا تاجىبايەۆتىڭ تۋعان كۇنى

استانا. قازاقپارات - بۇگىن اقىن، دراماتۋرگ، ادەبيەتتانۋشى، فيلولوگيا عىلىمىنىڭ دوكتورى، پروفەسسور، قوعام قايراتكەرى، قازاقستاننىڭ حالىق جازۋشىسى، قازاقستان مەملەكەتتىك سىيلىعىنىڭ لاۋرەاتى ءابدىلدا تاجىبايەۆتىڭ تۋعان كۇنى.

ول 1909-جىلى قىزىلوردا قالاسىندا تۋعان. قازاق مەملەكەتتىك ۋنيۆەرسيتەتىن بىتىرگەن.

1932-1948-جىلدارى قارساقبايداعى «قىزىل كەنشى»، رەسپۋبليكالىق «جاس الاش» گازەتتەرىندە رەداكتوردىڭ ورىنباسارى، قازاقستان جازۋشىلار وداعى باسقارماسىنىڭ حاتشىسى، ءتوراعاسى، قازاقستانعا ءتىل جانە ادەبيەت ينستيتۋتى جامبىل ءبولىمىنىڭ مەڭگەرۋشىسى بولدى. 1948-1958-جىلدارى شىعارماشىلىقپەن اينالىستى. 1959-1984-جىلدارى «قازاق ادەبيەتى» گازەتىنىڭ جاۋاپتى رەداكتورى، قازاقستان جازۋشىلار وداعى باسقارماسىنىڭ حاتشىسى، قازاقستانعا ادەبيەت جانە ونەر ينستيتۋتىنىڭ اعا عىلىمي قىزمەتكەرى، تەاتر ونەرى ءبولىمىنىڭ مەڭگەرۋشىسى قىزمەتتەرىن اتقاردى.

ءا. تاجىبايەۆتىڭ «جۇرەكتىلەر» پەسالار جيناعى، «حالقىم تۋرالى اڭىز»، «جومارتتىڭ كىلەمى»، «كوتەرىلگەن كۇمبەز» اتتى درامالىق داستاندارى، «مايرا»، «جارتاس»، «جالعىز اعاش ورمان ەمەس»، «كوڭىلدەستەر»، «قىز بەن جىگىت»، «مونولوگتار» اتتى درامالىق شىعارمالارى جارىق كورگەن. «دۋباي شۋبايەۆيچ»، «توي بولاردا» اتتى كومەديالارى بار. ول ادەبيەتتانۋ سالاسىندا دا ءونىمدى ەڭبەك ەتتى.

ونىڭ «قازاق دراماتۋرگياسىنىڭ دامۋى مەن قالىپتاسۋى» اتتى زەرتتەۋىندە قازاق دراماتۋرگياسىنىڭ كۇردەلى ماسەلەلەرى جان-جاقتى قاراستىرىلعان. اقىننىڭ «جىلدار، ويلار»، «جاداننىڭ حاتتارى»، «حاتتار سويلەگەندە»، «ءومىر مەن ەرلىك» دەگەن سىن، ەسسە، پروزا كىتاپتارىندا ادەبيەت پەن ونەرگە قاتىستى جايلار جونىندە تولىمدى پىكىرلەر ايتىلادى. 1954-جىلى ءا. تاجىبايەۆتىڭ سەناريى بويىنشا «جامبىل» فيلمى ءتۇسىرىلدى. 1998-جىلى دۇنيەدەن وزعان.

«قازان توڭكەرىسى»، 2 مارتە «ەڭبەك قىزىل تۋ»، «قۇرمەت بەلگىسى» وردەندەرىمەن جانە مەدالدارمەن ماراپاتتالعان.