ينتەرنەت كەڭىستىگىندە زاڭسىز ماتەريالداردى تاراتۋعا توسقاۋىل قويىلماق
بۇل تۋرالى باس پروكۋراتۋرانىڭ باسپا ءسوز قىزمەتى حابارلايدى. تەرروريستىك ۇيىمدار كۇندەلىكتى ينتەرنەت جەلىسى ارقىلى ءوز قاتارلارىنا جاڭا جاقتاستاردى تارتۋمەن اينالىسۋدا. تۇبىندە تەرروريستىك ۇيىمداردىڭ ءىس- قيمىلدارى جالپى الەمدەگى تۇراقتىلىقتى بۇزۋعا باعىتتالعان.
وسىنداي كورىنىستەرمەن كۇرەسۋ ءۇشىن ەلىمىزدىڭ مەملەكەتتىك ورگاندارى تەرروريزمنىڭ قاۋىپتەرىنەن قوعامنىڭ قاۋىپسىزدىگىن قامتاماسىز ەتۋ شارالارىنىڭ جۇيەسىن پىسىقتادى، ونىڭ تيىمدىلىگى ارتتىرىلۋدا.
بۇدان باسقا، راديكالدى يدەولوگيانىڭ ينتەرنەت كەڭىستىگىندە تارالۋىنا قارسى ءىس- قيمىل تەرروريزمگە قارسى قىزمەتتىڭ اسا ماڭىزدى جانە ماعىنالى ماسەلەلەرىنىڭ ءبىرى بولىپ تابىلادى. ويتكەنى ونىڭ مىندەتىنە قۇقىققا قايشى مازمۇننىڭ تارالۋىنىڭ جولىن كەسۋ عانا ەمەس، سونداي- اق، ينتەرنەت جەلىسىنىڭ قولدانۋشىلارىندا راديكالدى يدەيالاردىڭ قالىپتاسۋىنا جول بەرمەۋ كىرەدى. پروكۋراتۋرا ورگاندارى باسقا مەملەكەتتىك ورگاندارمەن بىرگە زاڭسىز ماتەريالداردىڭ تارالۋىنا جول بەرمەۋ ماقساتىندا ەكسترەميزم مەن تەرروريزمدى ناسيحاتتايتىن، سونداي- اق، قولدان جاسالعان جارىلعىش قۇرىلعىلاردى جانە جارىلعىش زاتتاردى دايىنداۋ بويىنشا ماتەريالداردى تاراتاتىن ينتەرنەت- رەسۋرستاردى انىقتاۋ جانە جولىن كەسۋ بويىنشا جۇمىس جۇرگىزۋدە.
وسى جۇمىس اياسىندا ءجۇز مىڭنان استام ينتەرنەت- رەسۋرستىڭ مونيتورينگى جۇزەگە اسىرىلدى. ەكسترەميزم مەن تەرروريزم يدەيالارىن ناسيحاتتاۋدىڭ، سونداي-اق، جارىلعىش قۇرىلعىلاردى قولدان جاساۋ تاسىلدەرى تۋرالى اقپاراتتى تاراتۋدىڭ انىقتالعان فاكتىلەرى بويىنشا تالاپ-ارىز جۇمىستارى جۇرگىزىلدى، سونداي-اق سوتقا دەيىنگى رەتتەۋ شارالارى قابىلداندى. سوڭعى بەس جىلدا ەلىمىزدىڭ سوتتارى ءبىر مىڭنان استام ينتەرنەت-رەسۋرستاردىڭ ونىمدەرىن زاڭسىز دەپ تانۋ تۋرالى پروكۋرورلاردىڭ جانە ۋاكىلەتتى ورگاننىڭ ارىزدارىن قاناعاتتاندىرىپ، ولاردىڭ قازاقستان اۋماعىندا تاراتىلۋىن توقتاتتى. سوتقا دەيىنگى تارتىپتە ينتەرنەت-رەسۋرستاردىڭ يەلەرىمەن جۇرگىزىلگەن جۇمىس ناتيجەسىندە 200 دەن استام ماتەريال جويىلدى.
www.24.kz
