قوستاناي وبلىسىندا پوليتسەيلەر حوككەي جانكۇيەرلەرىن قۇتقاردى
بۇل تۋرالى قوستاناي وبلىستىق ءى ءى د- نىڭ باسپا ءسوز قىزمەتىنەن حابارلايدى.
«2 -اقپاندا جاستار سۇيىكتى كومانداسىنا قولداۋ كورسەتۋ ءۇشىن قوستانايدان رۋدنىيعا كەلگەن. جىگىتتەر جارىستى ۇيىمداستىرۋشىلار كەرى الىپ قايتادى دەگەن سەنىمدە بولىپ، قالتالارىنا اقشا سالىپ شىقپاعان، وزدەرىندەگى بار قاراجاتتارىن ماتچقا كىرۋ بيلەتتەرىنە جۇمساعان»، - دەپ حابارلادى پوليتسيادان.
«ساعات 22 نىڭ شاماسىندا رۋدنىي- قوستاناي كۇرە جولىندا جولدىڭ بويىمەن كەلە جاتقان ءبىر توپ جىگىتتى كوردىك. ولاردىڭ ۇيلەرىنە كولىكپەن بارۋعا اقشالارى بولماعان سوڭ، جاياۋ شىعىپ كەتكەنى بەلگىلى بولدى»، - دەپ باياندادى اعا سەرجانت داۋلەت تىلەۋكەنوۆ.
پوليتسەيلەر 16-20 جاس ارالىعىنداعى جاس جانكۇيەرلەردى قوستانايعا جەتكىزۋ ءۇشىن اۆتوبۋس شاقىردى. ءتارتىپ ساقشىلارى سونداي-اق ولاردىڭ اتا-انالارىن جاسوسپىرىمدەردى قوستانايلىق اۆتوۆوكزالدا كۇتىپ الۋىن ەسكەرتتى.
ءى ءى د- نىڭ باسپا ءسوز قىزمەتىندە پوليتسيانىڭ اعا سەرجانتى داۋلەت تىلەۋكەنوۆتىڭ «ەرلىگى ءۇشىن» ناگراداسىنىڭ يەسى ەكەنىن اتاپ وتۋدە. 2012 -جىلى ول قىزمەتتەسىمەن بىرگە سۋعا باتىپ بارا جاتقان ادامدى قۇتقاردى. بۇل ەرلىك ءىسى ق ر ىشكى ىستەر مينيسترلىگىندە باعالاندى. داۋلەتتىڭ ەسىمى «قوستاناي وبلىسىنىڭ التىن جاستارى» كىتابىنا ەنگىزىلگەن.
