قازاقستان شوۋ-بيزنەسىنىڭ جۇلدىزدارى ءوز كاسىبىن جاقسى كورەتىن ادامداردى قولدادى

استانا. قازاقپارات - قازاقستان شوۋ- بيزنەسىنىڭ جۇلدىزدارى «ءوز كاسىبىندى ءسۇي» اتتى اۋقىمدى ينتەرنەت- اكسياسىن قولدادى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا بلوگەر جومارت ءامىرحانوۆ ءمالىم ەتتى.

«بۇل جوبا ءبىزدىڭ جۇلدىزداردىڭ قولداۋىنسىز وسىنداي دەڭگەيدە جاريالانباس ەدى. اتاپ ايتقاندا، قايرات نۇرتاس، ءالي وقاپوۆ، ءلايلا سۇلتان قىزى بەلسەندى تۇردە قاتىستى. سونىمەن قاتار بۇل شاراعا سولتۇستىك قازاقستان، قاراعاندى جانە قىزىلوردا وبلىستارى كەڭىنەن ءۇن قوستى»، - دەدى ول.

قازنەتتە باستاۋ العان «ءوز كاسىبىندى ءسۇي» جوباسى ءوز ءىسىن جاقسى كورەتىن جانە وسى جايىندا بولىسكىسى كەلەتىن قازاقستاندىقتاردى بىرىكتىرە ءتۇستى.

«ينتەرنەت- اكسيا ءۇشىن ءبىز ەڭ قاراپايىم ءارى قولجەتىمدى فورماتتى تاڭدادىق، ياعني پايدالانۋشىلار وزدەرىنىڭ ۇيالى تەلەفوندارىنا ۆيدەوروليكتەردى جازىپ، ونى الەۋمەتتىك جەلىلەردەگى پاراقشالارىندا ءبىرىڭعاي حەشتەگپەن ( #وزكاسىبىڭدى ءسۇي) جاريالايدى. ءبىزدىڭ جوبا اۋقىمدى ينتەرنەت- اكتسياعا اينالىپ، ونى قازاقستاندىقتار كەڭىنەن قولدادى»، - دەدى ول.

ج. ءامىرحانوۆتىڭ ايتۋىنشا، ارنايى Youtube كانال قۇرىلىپ، وندا الەۋمەتتىك جەلىلەر پايدالانۋشىلارىنىڭ ەڭ ۇزدىك 200 بەينە روليكتەرى جاريالاندى. «ءبىزدىڭ اكسيا جالعاسۋدا جانە ءاربىر قازاقستان ازاماتىندا ءوز كاسىبىن نەلىكتەن جاقسى كورەتىندىگىن بايانداپ بەرۋگە مۇمكىندىگى بار»، - دەدى ول.

اۆتور: رۋسلان عابباسوۆ