گ. گولوۆكيننىڭ «نۇر وتاننىڭ» پارتيالىق تىزىمىنە كىرگىزىلۋى زاڭدى ما؟

استانا. قازاقپارات - گەننادي گولوۆكيننىڭ «نۇر وتاننىڭ» پارتيالىق تىزىمىنە كىرگىزىلۋىندە ەشقانداي زاڭ بۇزۋشىلىق جوق.

بۇل تۋرالى بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ ءمالىم ەتتى.

 «بۇگىن ق ر ورتالىق سايلاۋ كوميسسياسى «نۇر وتان» پارتياسىنىڭ ماجىلىسكە ۇسىنعان ۇمىتكەرلەرىنىڭ ءتىزىمىن بەكىتتى. ەندىگى جەردە، وسى جاقىن كۇندەرى سەنىمدى وكىلدەردىڭ ءتىزىمىن تىركەۋ ءۇشىن سايلاۋ كوميسسيالارىنا ۇسىناتىن بولامىز. بۇگىنگى تىركەۋ ەندىگى جەردە بىزدەرگە سايلاۋ قورلارىن، ارنايى ەسەپشوتتار اشۋعا مۇمكىندىك بەرەدى. جالپى، مەن بۇگىنگى تاڭدا وسى سايلاۋ ناۋقانىنا بايلانىستى «نۇر وتان» پارتياسىنىڭ ارنايى بەكىتىلگەن جۇمىس جوسپارى وسى و س ك كەستەسىنە سايكەس ۋاقىتىلى، تولىققاندى اتقارىلىپ جاتقانىن اتاپ وتكىم كەلەدى»، - دەدى ول.

ا. مىرزاحمەتوۆ پارتيالىق تىزىمگە ەنگەن 127 ۇمىتكەرلەردىڭ بارلىعىن دا بۇگىن ق ر ورتالىق سايلاۋ كوميسسيا تىركەگەندىگىن دە اتاپ ءوتتى. سونداي- اق ول ب ا ق وكىلدەرىنىڭ بوكسشى گەننادي گولوۆكيننىڭ پارتيالىق تىزىمگە كىرۋىنە قاتىستى ساۋالىنا جاۋاپ بەردى.

«بۇل جەردە ەشقانداي زاڭبۇزۋشىلىق جوق. گەننادي گولوۆكين قازاقستان رەسپۋبليكاسىنىڭ ازاماتى. ول جيىندار، جاتتىعۋلار ءۇشىن شەتەلگە كەتسە دە پارتيالىق تىزىمگە كىرۋىنە ەش توسقاۋىل جوق»، - دەدى ا. مىرزاحمەتوۆ.

ونىڭ سوزىنە قاراعاندا، گ. گولوۆكيندى پارتيالىق تىزىمگە كىرگىزەر الدىندا زاڭگەرلەر بۇل ماسەلەنى جان-جاقتى زەردەلەپ شىققان.

«بۇل رەتتە زاڭگەرلەر ق ر زاڭناماسىنىڭ، ونىڭ ىشىندە سايلاۋ تۋرالى دا زاڭنامانىڭ قانداي دا بۇزۋشىلىققا ۇشىرايتىندىعىن تاپقان جوق»، - دەدى ا. مىرزاحمەتوۆ.

اۆتور: مارلان جيەمباي