وقۋشىلار جاقسى كورەتىن مۇعالىم بەينەسى قانداي؟

 استانا.قازاقپارات - مەكتەپ كەزىندە كەي پاندەردى مۇعالىمى ءۇشىن عانا وقىعانىمىز جاسىرىن ەمەس. ال كەي مۇعالىمدەردى ساباق بەرەتىن ءپانى ءۇشىن عانا جاقسى كورىپ، سىرتىنان «ينفورماتيكا اپاي، "فيزيكا اپاي» دەپ اتاعان كەزىمىز دە بولدى.

مۇعالىمدەردىڭ وقۋشىلاردىڭ سۇيىكتى ۇستازىنا اينالۋى - ماڭىزدى قۇبىلىس.

بالا ساباقتى جاقسى وقىپ، ۇلى تۇلعاعا اينالۋى ءۇشىن شاكىرت پەن ۇستاز اراسىندا مىزعىماس ماحاببات ورناۋى ءتيىس. بالالاردىڭ جۇرەگىن قالاي جاۋلايمىز؟ وقۋشىلاردىڭ سۇيىكتى ۇستازىنا اينالۋ ءۇشىن نە قاجەت؟

بارلىق بالانى بىردەي جاقسى كورىڭىز. ءوزىن جاقسى كورەتىن ادامدى جەك كورۋ كەز كەلگەن كىسىنىڭ قولىنان كەلمەيدى. ءار بالانىڭ ارتىقشىلىعى، اشىلماعان دارىنى بولادى، سونى كورە ءبىلىڭىز. كەمشىلىگى بولسا، تەرەڭىنە ءۇڭىلىڭىز:

نە ءۇشىن تەنتەك بولعانىن؛

جالقاۋ بولۋىنا نە سەبەپكەر ەكەنىن؛

ءۇي تاپسىرماسىن ورىنداماۋىنا نە كەدەرگى بولعانىن انىقتاپ كورىڭىز.

كەز كەلگەن جاعدايعا تۇسىنىستىك تانىتاتىن مۇعالىمدى سىيلاماۋ مۇمكىن ەمەس. قاتەلىك جىبەرگەن وقۋشىعا جازا قولدانۋ ورنىنا، كەلەسىدە قايتالامايتىنىنا زور سەنىم ءبىلدىرىڭىز. ول سەنىمىڭىزدى اقتاۋ ءۇشىن بارىن سالاتىن جاعداي جاساڭىز.

قىزىقتىرا ءبىلىڭىز. ءار ساباق سايىن بولماسا دا، ەرەكشە تاپسىرمالاردى ءجيى- ءجيى بەرىپ تۇرىڭىز. كۇندەلىكتى ءبىرقالىپتى ساباق ءوتۋ مەن ءۇي تاپسىرماسىنان بالا تەز جالىعادى. ساباق ۇستىندە ويىندار ۇيىمداستىرىپ، ادەتتەگىدەن تىس تاپسىرما تابىڭىز. ءار تاقىرىپ بولاشاققا قانداي پايداسى بارىن تاۋىپ، بالا زەردەسىنە جەتكىزە ءبىلىڭىز.

وقىتۋشىنىڭ مىندەتى بالالارعا جەكىپ ۇرسۋ ەمەس، ءبىلىم بەرۋ. ءبىلىم بەرۋ ءۇشىن، ءتارتىپ ورناتۋ قاجەت. ەگەر پەداگوگيكالىق- پسيحولوگيالىق ساۋاتىڭىز جوق بولسا، وقىتاتىن ءپانىڭىزدىڭ جىلىگىن شاعىپ، مايىن ىشكەنىڭىز قاجەت ەمەس. ءار بالامەن ءوز قاتارلاسىڭىزداي سويلەسىپ، جەكە سىرلاسىپ، ءتىلىن تابا ءبىلىڭىز.

كوپشىلىك كوزىنشە ەش وقۋشىنىڭ كەمشىلىگىن ايتا كورمەڭىز. ارادا كيكىلجىڭ تۋىنداسا، ەشكىمگە شاعىمدانباي، ءوزىڭىز جىلدام شەشىمىن تابۋعا تىرىسىڭىز. بالانىڭ اتا- اناسىن شاقىرىپ، سىنىپ جەتەكشىسىنە، مەكتەپ ديرەكتورىنە ارىز ايتۋ - ەڭ وسال مۇعالىمنىڭ ءىسى.

ساباق ۇستىندە ءسىز ويلاماعان سۇراق قويىپ، تىعىرىققا تىرەسە، «وسى سۇراقتىڭ جاۋابىن ءوزىڭ ويلانىپ كورشى. ەگەر ەرتەڭگە دەيىن تابا الماساڭ جاۋابىن مەن ايتامىن، جاقسىلاپ ويلانساڭ تاباسىڭ» دەڭىز. كەلەسى كۇنگە دەيىن ويلانۋعا ءوزىڭىز ۋاقىت تاباسىز ءارى بالا ميىن ىسكە قوسىپ، ويلانۋىنا مۇمكىندىك بەرەسىز.

بارىنشا ۇستامدى، سابىرلى بولىڭىز. وقۋشى جاڭا تاقىرىپتى نە تاپسىرمانى بىردەن تۇسىنبەسە، جۇيكە جۇقارتىپ، بەكەر تاۋسىلماڭىز. ءوزىڭىزدى شىدامدىلىققا شاقىرىپ، باسقا ادىسپەن ءتۇسىندىرىپ كورىڭىز، ومىردەن مىسال كەلتىرىڭىز. تۇك تۇسىنبەي جاتسا، ساباق سوڭىندا جەكە تۇسىندىرەمىن دەڭىز، بىرنەشە رەت تۇسىندىرۋدەن جالىقپاڭىز. قازىردەن باستاپ بايسالدى بولماساڭىز، تەمىردەي توزىمدىلىككە ۇيرەنبەسەڭىز، ۇستازدىق جولىڭىز الىسقا بارمايدى.

massaget.kz