جامبىل وبلىسىنىڭ اكىمى بولاشاق فۋتبولشىلاردى قابىلدادى

استانا. قازاقپارات - بۇگىن جامبىل وبلىسىنىڭ اكىمى كارىم كوكىرەكبايەۆ بولاشاق فۋتبولشىلاردى قابىلدادى.

باسقوسۋدا وڭىردەگى فۋتبول ويىنىنىڭ بولاشاعى، ونى دامىتۋ جايى ايتىلدى، دەپ حابارلايدى وبلىس اكىمدىگىنىڭ باسپا ءسوز قىزمەتى.

ءوڭىر باسشىسى كارىم كوكىرەكبايەۆتىڭ قولداۋىمەن وبلىستىق مامانداندىرىلعان «دارىن» سپورت مەكتەبىندە فۋتبول كلاسى اشىلعان. اتالعان مەكتەپتەگى 400 بالانىڭ اراسىنان ىرىكتەلىنىپ، 18 ى تاڭدالىنىپ الىنعان. ولاردىڭ اراسىنان دا ەڭ مىقتىلارىنا تاڭداۋ جاسالىنىپ، شەتەلگە وقۋعا جىبەرىلۋدە.

«تاراز» فۋتبول كلۋبىنىڭ قۇرامىن جەرگىلىكتى فۋتبولشىلارمەن تولىقتىرۋ جۇمىسى جالعاسۋدا. بۇل ماقساتتا بۇگىنگى كۇنى 3 جەتكىنشەك شەتەلدە وقۋلارىن جالعاستىرسا، تاعى 2 ءجاسوسپىرىم برازيلياعا تەڭبىل دوپ تەبۋدىڭ قىر-سىرىن ۇيرەنۋگە وقۋعا جولداما الىپ وتىر.

«سەندەر 2-3 -جىلدا وقۋلارىڭدى اياقتاپ، دايىندالىپ كەلەتىن بولساڭدار، ءبىزدىڭ «تاراز» فۋتبول كلۋبىنىڭ دارەجەسى دە، ساپاسى دا كوتەرىلەدى. شەتەلدەن لەگيونەرلەردى اكەلىپ، وعان قىرۋار قارجى تولەگەنشە، ولاردىڭ ورنىنا وزدەرىڭ، قازاقتىڭ قاراكوز بالالارى ويناسىن. سوندىقتان ءبىز وزدەرىڭە ءۇمىت ارتامىز»، - دەگەن ايماق باسشىسى ولارعا تابىس پەن ساتتىلىك تىلەدى.

ەسكە سالا كەتسەك، «تاراز» فۋتبول كلۋبى قازاقستان پرەمەر ليگاسىندا جىل سايىن 7-9 -ورىندار اراسىنان كورىنىپ كەلەدى.