جاڭا كوركەم فيلم جارىققا شىقتى - فوتو
قازاقستاندىق تولىق مەتراجدى فيلمنىڭ رەجيسسەرى اقجول ءابىلوۆتىڭ ايتۋىنشا، كارتينانىڭ يدەياسى سەناريست ارداق قارىقبولوۆامەن بىرلەسكەن اۆتورلىقتا جاسالعان. كينوتاسپانى قۇرۋ تاريحى كەلەشەك رەجيسسەر - قازاق ۇلتتىق ونەر ۋنيۆەرسيتەتى ستۋدەنتىنىڭ كۋرستىق جۇمىس ءۇشىن تاقىرىپ ىزدەۋىنەن وربىگەندىكتەن، باستاپقىدا فيلم قىسقا مەتراجدى تۋىندى رەتىندە ويلاستىرىلعان ەكەن. الايدا وقيعا سوڭى سيۋجەتتەرمەن، كەيىپكەرلەرمەن تولىقتىرىلا كەلە، سەناري شىنايى ءومىر جاعدايلارىنا نەگىزدەلگەن تولىققاندى فيلمگە اينالعان.
انىعىراق توقتالساق، مازمۇنى وتە قاراپايىم فيلم ءوزىنىڭ شىنايىلىعىمەن ءارى ناقتىلىعىمەن كورەرمەندى باۋراپ الماق. فيلمنىڭ باسىندا كورەرمەندەرگە كارتينانىڭ باستى كەيىپكەرى - اسقار ەسىمدى بويداق ءارى ىسكەر ازامات تانىستىرىلادى. ول دوستىقتى باعالامايتىن، ماحابباتتىڭ نە ەكەندىگىن تۇسىنبەيتىن جانە اينالاداعى ادامداردى سىيلامايتىن جىگىت. كۇندەردىڭ ءبىر كۇنىندە اسقار كەنەت ەسىن جوعالتادى. ودان كەيىن ۇنەمى اۋرۋحانادا جاتۋ، مەديتسينالىق تەكسەرىستەردەن ءوتۋ ونى تىپتەن ابىرجىتىپ جىبەرەدى. دارىگەرلەر وعان وتا دا قاۋقارسىز ۇدەمەلى مي ىسىگى دياگنوزىن قويادى. ءبىر اي عانا ءومىرى قالعانىن ەستىگەن اسقار تەرەڭ كۇيزەلىسكە تۇسەدى...
ءسويتىپ، ىشىمدىككە سالىنىپ ءجۇرىپ، ول ءبىر كۇنى تاعدىردىڭ تالكەگىمەن الدەبىر اۋىلعا تاپ بولادى. مىنە، وسى ەلدى مەكەندە اسقار ەرەكشە ءبىر وقيعاعا كەزىگەدى. سونىڭ ارقاسىندا اسقار مۇلدەم وزگەرەدى، قارىم- قاتىناستى، ءومىردى جانە ماحابباتتى باعالاي باستايدى. ءفيلمنىڭ اقىرى ودان دا قىزىقتى، وعان كورەرمەندەر وزدەرى تاماشالاعاندا كۋا بولادى. «مەزەت يلي پروستو جيزن» فيلمىنىڭ كورسەتىلىمى 4 -اقپاندا باستالادى دەپ كوزدەلۋدە.
فيلمدەگى باستى ءرولدى تانىمال وتاندىق اكتەر - نۇرجان سادىبەكوۆ وينايدى. سونىمەن قاتار، فيلمدە باسقا دا كينو جۇلدىزدارى نۇرجان تۇتوۆ، گۇلباحرام بايبوسىنوۆا، المات ساقاتوۆ، ەردەن تەلەمىسوۆ، ازات سەيتمەتوۆ كورەرمەندەرىن قۋانتپاق.
اۆتور: كەنجەكەي توقتامۇرات قىزى
