باقتيار ارتايەۆ تورەعالي تورەالىگە «مەرسەدەس» سىيلاعان
ءانشى مۇنداي قوماقتى سىيدى ومىردە دە، ونەردە دە كوپ الماعانىن العا تارتقان.
«ايتىستا جۇرگەندە «تويوتا 25» دەگەن ماشينا جەڭىپ العانمىن. كۇنى كەشەگە دەيىن سونىمەن ءجۇردىم. كەيدە تاكسيمەن، كەيدە جاياۋ دا جۇرە بەرەمىز. جۋىردا بوكسشى باقتيار ارتايەۆ اعامىز «مەرسەدەس 221» ماركالى ماشينا تارتۋ ەتتى. ازىرگە ەڭ جاقسى سىي وسى بولىپ تۇر»، - دەيدى اقىن.
تورەعاليدىڭ سوزىنشە، ونەردەن تۇسكەن تابىس تەك قانا ونەرگە عانا جۇمسالادى. ءان جازدىرىپ، بەينەبايان تۇسىرۋگە قاجەتتى قاراجاتتى تابۋ ماسەلەسى اكەسىنىڭ موينىندا. ويتكەنى، ءانشىنىڭ باسقا دەمەۋشىسى جوق.
تورەعالي شامالى ۋاقىتتا حالىقتىڭ كوزايىمىنا اينالعانىن 90 پايىز اكەسىنىڭ ەڭبەگى دەپ بىلەدى. اكەسى ونى كىشكەنتايىنان جانىنا ەرتىپ ءجۇرىپ، ءومىر مەن ونەردىڭ قىر- سىرىنا باۋلىعان.
ءارتىس نەگىزگى ماماندىعى اكتەر ەكەنىن ايتا كەلە، انشىلىك جولعا تۇسكەنىنە ەش وكىنبەيتىنىن جەتكىزدى.
«اكتەرلىكتى وقىپ جۇرگەندە ايتىسقا كوپ شىعاتىنمىن. ول كەزدە كينوعا تۇسۋگە شاقىرتۋ كوپ تۇسەتىن ەدى. ءبىراق بۇل جولعا تۇسكەنىمە ەش وكىنبەيمىن. ويتكەنى، انشىلىك ونەردىڭ ايتىستا تيگىزگەن پايداسى كوپ»، - دەيدى تورەعالي.
اڭگىمە اراسىندا تورەعالي اقىندارمەن مەككەگە بارعان ساپارى جايلى دا بايانداپ ءوتتى.
«قايرات ساتىبالدى اعامىزمەن بىرگە مەككەگە بارۋدىڭ ءساتى ءتۇستى. ول جاقتا قاعبانى اينالىپ، دۇعا جاساعاندا، قۇدايدىڭ سونى ىشتەي قابىل ەتەتىنىن سەزگەندەي بولدىم. سوندىقتان بولار، مەككەدە ءوزىمدى جايلى سەزىندىم»، - دەيدى جاس ءانشى.
ءارتىس حالىققا بەيمالىم قىرلارى جايلى دا سىر تارقاتتى. دومبىرا جيناعاندى ۇناتاتىن ءانشى قولى بوس كەزدە دومبىرانى ارنايى شەبەرلەرگە تاپسىرىس بەرىپ جاساتاتىنىن تىلگە تيەك ەتتى. تورەعالي قاعازعا تۇرتكەن جازبالارىن دا كىتاپ ەتىپ شىعارۋدى جوسپارلاپ وتىر.
«كەلەشەكتە ساپاسى سىن كوتەرەتىن شىعارماشىلىق تۋىندىلارىمدى كىتاپ قىلىپ شىعارسام با دەگەن ويىم بار»، - دەيدى اقىن.
تورەعالي تورەالى بولاشاقتا جولى تۇسسە، كوگىلدىر ەكراننان كورىنۋى مۇمكىن ەكەنىن دە ايتىپ قالدى. ءبىراق ازىرگە تەلەحيكاياعا ءتۇسۋ ءارتىستىڭ جوسپارىندا جوق.
«قامشى» سىلتەيدى
