نەسيەگە ءبىلىم العاندار قارىزىن قايتارماسا نەسيە الا المايدى
بۇل نەسيە 1999-2005 -جىلدار اراسىندا ءبىلىم العان ستۋدەنتتەرگە قازىنادان بەرىلگەن.
وسى مەرزىم ارالىعىندا گرانتقا ىلىگە الماي قالعان 58 مىڭ جاستىڭ ءبىلىم الۋىنا بيۋدجەتتەن 15 ميلليارد 288 ميلليون تەڭگە بولىنگەن ەدى. سونىڭ 9 ميلليارد 148 ميلليون تەڭگەسى ءالى قايتارىلماعان. نەسيەگە وقىپ، بەرەشەك بوپ قالعان بۇرىنعى شاكىرتتەردىڭ جالپى سانى 35 مىڭ ەكەن. ولاردىڭ سوڭعى لەگىنىڭ وقۋ بىتىرگەنىنە ون جىلدان اسسا دا قازىناعا تەك 6 ميلليارد تەڭگە عانا قايتارىلعان.
نەسيەگە ءبىلىم الۋ ول كەزدەرى ەكىنىڭ بىرىنە «بۇيىرماعان باقىت» بولاتىن. ۇ ب ت قورىتىندىسى بويىنشا گرانتقا بىرنەشە بالى عانا جەتپەي قالعان تالاپكەرلەرگە ۇكىمەت قاراسىپ، ولاردىڭ وقۋىن تولەپ بەردى. ونداي جۇيەمەن ءبىلىم العان ستۋدەنتتەر 15 جىلعا بەرىلگەن نەسيەنى جۇمىسقا ورنالاسقاننان جارتى جىل وتكەن سوڭ، جالاقىسىنىڭ ەسەبىنەن قايتارا باستاۋى ءتيىس بولاتىن. كەشىكتىرگەنى ءۇشىن قولدانىلاتىن شارالار دا قاراستىرىلماعان. بۇل جوبا 2005 -جىلى توقتاتىلىپ، نەسيەگە ءبىلىم الاتىن جاستار گرانتقا اۋىستىرىلدى. وسىدان بولسا كەرەك، سۋتدەنتتەردىڭ كوبى نەسيە قارىزى جويىلدى دەپ ويلاعان. الايدا، ارادا جىلدار وتكەن سوڭ ۇكىمەت ولاردىڭ قارىزىن ەستەرىنە سالدى.
بەرەشەگىنىڭ بار ەكەنىن ۇمىتۋعا ەڭ الدىمەن ستۋدەنتتەردى نەسيە جۇيەسىنەن گرانتقا اۋىستىراردا دۇرىس اقپارات بەرىلمەۋى سەبەپ. قالا بەردى پايىزسىز بەرىلەتىن مەملەكەتتىك قاراجاتتى الاتىن تۇلعانىڭ تۇرعىلىقتى مەكەن جايى دا ناقتىلانباعان. سالدارىنان، ولارعا العان قارىزىن تولەۋ تۋرالى ەسكەرتپەلەر بەرۋ دەر كەزىندە جۇرگىزىلمەدى. باعدارلاما وپەراتورى بۇل ماسەلەنى سوتقا جەتكىزبەي شەشۋدىڭ جولى بار ەكەنىن ايتادى.
ءبىلىم نەسيەسىن قايتارماعان ادامنىڭ اتى-ءجونى مەملەكەتتىك نەسيە بيۋروسىنا جىبەرىلەدى دە ونداي ازاماتقا بانكتەر نەسيە بەرمەي قويادى، ءارى شەت ەلگە شىعاردا قيىندىقتار تۋىنداۋى مۇمكىن.
كۇتپەگەن جەردەن كەدەرگىگە تاپ بولماس ءۇشىن ءبىلىم نەسيەسىمەن
وقىعاندار 0802828 (800) 8 نومىرىنە حابارلاسىپ، ءمان جايدى انىقتاۋى ءتيىس. قوڭىراۋ شالۋ تەگىن.
