الماتىدا «بابالار اڭساعان تاۋەلسىزدىك» اتتى ۇلتتىق بايقاۋ باستالدى

الماتى. قازاقپارات - بۇگىن ءا. قاستەيەۆ اتىنداعى ق ر مەملەكەتتىك ونەر مۇراجايى تاريحي جانرداعى بەينەلەۋ ونەرى بويىنشا «بابالار اڭساعان تاۋەلسىزدىك» اتتى ۇلتتىق بايقاۋدىڭ باستالعاندىعىن جاريالادى.

«ءبىز مۇراجاي قورىندا قازاق حالقىنىڭ تاريحىن بەينەلەيتىن تۋىندىلاردىڭ جەتكىلىكسىز ەكەندىگىن تۇسىندىك. كەز- كەلگەن تاقىرىپتىڭ كوركەمدىك- بەينەلىك تۇرعىدا كورسەتىلۋى ۇرپاقتى ۇلتجاندىلىق رۋحتا تاربيەلۋدە ۇلكەن ماڭىزعا يە. سوندىقتان، تاريحي جانر - ونەر سالاسىنداعى وتە ءبىر كۇردەلى جانرلاردىڭ ءبىرى. بۇل جەردە كوپتەگەن ماتەريالداردى زەرتتەۋگە، زەردەلەۋگە تۋرا كەلەدى. سول ءۇشىن دە بۇل بايقاۋ وسى جانردىڭ دامۋىنا سەرپىن بەرەدى دەگەن ۇمىتتەمىن»، - دەدى باسپا ءسوز ءماسليحاتى بارىسىندا مۋزەي ديرەكتورى گۇلميرا شالابايەۆا.

ءوز كەزەگىندە مۇراجاي ديرەكتورىنىڭ عىلىم بويىنشا ورىنباسارى ەۆفرات مامبەكوۆ قازاقستاننىڭ قازىرگى زامانعى ونەرىندە ۇيرەنشىكتى، داعدىلى وبرازدار قالىپتاسقاندىعىن جانە سيۋجەتتەردىڭ از ەكەندىگىن ايتتى.

«مەنىڭشە، بۇل بايقاۋ جاڭا درامالىق سيپاتقا يە وبرازدار مەن اتا- بابالارىمىز قاتىسقان تاريحي وقيعالاردىڭ كوركەمدىك بەينەسىنىڭ قالىپتاسۋىنا سەپتىگىن تيگىزەدى. سوندىقتان دا بايقۋدىڭ ماقساتى - ماڭىزدى تاريحي وقيعالار مەن تۇلعالاردى كوركەمدىك- بەينەلىك تۇرعىدا زەردەلەۋ جانە ولاردى بەرۋ تاسىلدەرى ارقىلى پاتريوتتىق تاربيەگە ىقپال ەتۋ. سونداي- اق، سۋرەتشىلەر اراسىندا باسەكە تۋدىرىپ، بەينەلەۋ ونەرى شەبەرلەرىنىڭ كاسىبي كوركەمدىك دەڭگەيىن كوتەرىپ، جەتىلدىرۋ»، - دەدى ە. مامبەكوۆ.

بايقاۋعا سۋرەتشىلەر دە مۇسىنشىلەر دە قاتىسا الادى. بايقاۋ شارتى بويىنشا تۋىندىلاردا قازاق حالقىنىڭ تاريحىندا 20- عاسىردىڭ باسىنا دەيىن ورىن العان ناقتى تاريحي وقيعالار كورىنىس تابۋى ءتيىس. بۇل جەردە اسا كوپ ايتىلماي كەلگەن وقيعالارعا باسا ءمان بەرىلەدى.

سونداي-اق، بايقاۋ شارتتارى ءا. قاستەيەۆ اتىنداعى مۇراجايدىڭ سايتىندا جاريالانادى. بايقاۋ 2016 -جىلدىڭ 15- جەلتوقسانىندا ءا. قاستەيەۆ اتىنداعى ق ر مەملەكەتتىك ونەر مۇراجايىنىڭ زالدارىندا ۇيىمداستىرىلاتىن قازاقستان تاۋەلسىزدىگىنىڭ 25 جىلدىعىنا ارنالعان كورمەمەن اياقتالادى.

اۆتور: جاپپاربەرگەن ايبوتا