ءا. ماساليموۆا: ەلباسى ۇسىنعان رەفورمالاردى جۇزەگە اسىرۋ - ءاربىر قازاقستاندىق ءۇشىن ۇلكەن جاۋاپكەرشىلىك

الماتى. قازاقپارات - ەلباسى ۇسىنعان بەس ينستيتۋتسيونالدىق رەفورمانى جۇزەگە اسىرۋ - ءاربىر قازاقستاندىق ءۇشىن ۇلكەن جاۋاپكەرشىلىك.

بۇل تۋرالى فيلوسوفيا عىلىمدارىنىڭ دوكتورى، پروفەسسور، ءال-فارابي اتىنداعى قازاق ۇلتتىق ۋنيۆەرسيتەتىنىڭ دەكانى ءاليا ماساليموۆا وسىلاي دەدى.

ونىڭ ايتۋىنشا، بۇل رەفورمالاردىڭ تابىستى بولۋى بيلىك پەن حالىقتىڭ ەرىك-جىگەرىنە تىكەلەي بايلانىستى.

«ۇلت جوسپارى - «100 ناقتى قادام» - ەلىمىزدەگى قوعامدىق قاتىناستار جۇيەسىن تۇبەگەيلى وزگەرتەدى. ءبىزدىڭ الداعى جىلدارداعى ورتاق مىندەتىمىز - وسى بەس ينستيتۋتسيونالدىق رەفورمانى كەزەڭ-كەزەڭمەن جۇزەگە اسىرۋ.

بۇل جەردە ولاردى كىمنىڭ، قالاي جۇزەگە اسىراتىنى وتە ماڭىزدى. مەملەكەتىمىزدىڭ ساياسي جاعىنان دا، ەكونوميكالىق جاعىنان دا تۇراقتىلىعىن ارتتىرۋعا باعىتتالعان بۇل كەلەلى مىندەتتەردى ورىنداۋ قولىمىزدان كەلەدى. ال مەملەكەت پەن قوعام ءبىرتۇتاستىعىن جانە تۇراقتىلىعىن ساقتاسا جانە رەفورمالار عىلىمي نەگىزدە جۇزەگە اسىرىلاتىن بولسا، ولار تيىمدىلىگى ارتا تۇسەدى»، - دەدى ءا. ماساليموۆا.

سونىمەن قاتار، عالىم الەمدەگى ەڭ دامىعان 30 ەلدىڭ قاتارىنا ەنۋ ستراتەگياسىن تەك بوگدە ەلدەردىڭ تاجىريبەلەرىنە ءسۇيىنىپ قانا جۇزەگە اسىرۋ مۇمكىن ەمەستىگىن جەتكىزدى.

«بۇل ءۇشىن وتاندىق عالىمدار باسەكەگە قابىلەتتى عىلىمي-زەرتتەۋ جوبالارى ارقىلى جاڭا تاسىلدەمەلەر، جاڭا بىلىمدەر، جاڭا ادىستەمەلەر ويلاپ تابۋلارى ءتيىس. سوندىقتان، ءبىز ءبىرىنشى كەزەكتە قوعامداعى وزەكتى ماسەلەلەردى انىقتاۋعا، بولاشاق دامۋدىڭ مودەلىن دايىنداپ، دامۋ سەناريىن ازىرلەۋگە، مونيتورينگ، ساراپتاما جانە باعا بەرۋ جۇيەسىن قالىپتاستىرۋعا كۇش سالۋىمىز قاجەت. ويتكەنى، دامۋ بارىسىندا كۇتپەگەن تاۋەكەلدەر، وزگەرىستەر ورىن الۋى مۇمكىن. ءبىز بۇعان دايىن بولۋىمىز كەرەك»، - دەدى ءا. ماساليموۆا.

اۆتور: جاپپاربەرگەن ايبوتا