قازاقستان مۇددەسىن، تاۋەلسىزدىگىن قورعاۋدىڭ جاڭا كەزەڭىنە ءوتىپ وتىرمىز - نۇرلان ورازالين

استانا. قازاقپارات - قازاقستان مۇددەسىن، تاۋەلسىزدىگىن قورعاۋدىڭ جاڭا كەزەڭىنە ءوتىپ وتىرمىز.

بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا پارلامەنت سەناتىنىڭ دەپۋتاتى، قازاقستان جازۋشىلار وداعىنىڭ ءتوراعاسى نۇرلان ورازالين وسىلاي ءمالىم ەتتى.

«دۇنيە تىنىشسىز، وسى تىنىشسىز دۇنيەنىڭ كەڭىستىگىندە قازاق ەلىنىڭ تىنىشتىعىن ساقتاپ، ونىڭ تاۋەلسىزدىك مۇراتتارىن قورعاۋ - بۇگىندە ءاربىر قازاقستاندىقتىڭ باستى پارىزى. سوڭعى «نۇر وتان» پارتياسىنىڭ كەزەكتەن تىس وتكەن سەزىندە ەلباسىمىز وسى ماسەلەگە قاتتى نازار اۋداردى. مۇنىمەن قوسا، بەس حالىقتىق رەفورمانىڭ جاي-جاپسارىن تاعى دا تەرەڭدەتىپ، جۇرتشىلىقتى جۇمىسپەن قامتاماسىز ەتۋ، سونداي-اق سىرتتا ءتۇرلى سەبەپتەرمەن جۇرگەن، ياعني ءبىزدىڭ ەكونوميكامىزعا ىقپالىن جۇرگىزە الماي جاتقان قاراجاتتى زاڭداستىرۋ جانە باسقا دا ماسەلەلەردى تالداي وتىرىپ، ەلباسى جولداۋداعى تۇگەل حالىققا ارنالعان پارمەندى ءارى قاناتتى ۇسىنىستارىن تاعى دا تەرەڭدەتتى. مىنە، سول ارقىلى حالىققا وتە جەتىمدى باعىتتا ءوز ءسوزىن قازاقستاندىقتارعا ارنادى»، - دەپ توقتالدى دەپۋتات.

وسى ورايدا ول بۇگىندە الەمدىك داعدارىس جايلاعان كەزدە ەلدى دامىتۋدىڭ تەتىكتەرىن بارىنشا جۇزەگە اسىرۋ كەرەكتىگىن، ياعني مەملەكەت باسشىسى اتاپ وتكەن ماقسات-مىندەتتەردى ورىنداۋعا كۇش سالۋ قاجەت ەكەنىن اتاپ ءوتتى.

«بۇل باعىتتاعى جۇمىستاردىڭ بارلىعى اينالىپ كەلگەندە ەلدىڭ تۇتاستىعىن، مەملەكەتتىڭ ىشكى جانە سىرتقى ابىرويى مەن بەدەلىن قامتاماسىز ەتۋ دەگەنگە سايىپ كەلەدى. وسىنىڭ بارلىعى ەلباسىنىڭ كەشەگى پارتيا سەزىندەگى بايانداماسىندا جان-جاقتى تولىق جانە بەس ينستيتۋتسيونالدى رەفورمامىزدىڭ سالا-سالاسى قالاي اتقارىلاتىنى ەگجەي- تەگجەيلى قامتىلدى. اتاپ ايتقاندا، بۇل شارالار جاۋاپتى كەزەڭدە ءبىر اتانىڭ بالاسىنداي جۇمىلىپ، مۇددەمىزدى، تاۋەلسىزدىگىمىزدى ساقتاۋدىڭ، قورعاۋدىڭ جاڭا كەزەڭىنە وتكەندىگىمىزدى بىلدىرەدى»، - دەپ ءتۇيدى ن. ورازالين.

ەستەرىڭىزگە سالا كەتەيىك، 29- قاڭتاردا استانادا «نۇر وتان» پارتياسىنىڭ كەزەكتەن تىس سەزى ءوتىپ، «قازاقستان-2021. بىرلىك. تۇراقتىلىق. جاسامپازدىق» جاڭا سايلاۋالدى باعدارلاماسى قابىلداندى. سونىمەن قاتار وندا ق ر پارلامەنتى ءماجىلىسىنىڭ دەپۋتاتتىعىنا ۇمىتكەرلەردىڭ پارتيالىق ءتىزىمى بەكىتىلدى.

اۆتور: رۋسلان عابباسوۆ