ءيت نەگە ۇليدى؟

استانا. قازاقپارات - جالپى العاندا يتتەر ءتۇرلى سەبەپتەردىڭ سالدارىنان ۇلۋى مۇمكىن.

ايتالىق، قارنى اشقاندا، دەنەسى توڭىپ جاۋراعاندا، ءبىر جەرى قاتتى اۋىرعاندا ت. ب.

بۇنىمەن قاتار، ءيت جىن- شايتاندى كورگەندە دە ۇليدى دەۋگە نەگىز بار. نەگە دەسەڭىز، ساحابا ءجابير يبن ابديللادان (ر. ا. ) جەتكەن ءبىر حاديستە ارداقتى پايعامبارىمىز (س. ا. ۋ. ) بىلاي دەگەن:

«ەگەر، تۇندە ءيتتىڭ ۇرگەنىن جانە ەسەكتىڭ اقىرعانىن ەستيتىن بولساڭدار، اللادان پانا تىلەڭدەر («ءاعۋزۋ ءبيللاھي ميناش شايتانير راجيم» دەپ ايتىڭدار). شىنىندا ولار سەندەر كورمەيتىن نارسەنى كورەدى» [1].

تاعى ءبىر حاديسىندە:

«قورازدىڭ شاقىرعانىن ەستىگەندە اللادان مولشىلىعىن سۇراڭدار. ويتكەنى، قوراز پەرىشتە كورگەندە شاقىرادى. ال ەسەكتىڭ اقىرعانىن ەستىگەندە (نەمەسە ءيتتىڭ ۇرگەنىن)، اللادان پانا تىلەڭدەر («ءاعۋزۋ ءبيللاھي ميناش شايتانير راجيم» دەپ ايتىڭدار). شىنىندا، ول شايتاندى كورگەندە اقىرادى» [2]، - دەيدى.

وسى سوڭعى ءحاديستىڭ ارابشا نۇسقاسىندا «ءيتتىڭ ۇرگەنى» تۋرالى ايتىلماعانىمەن، ەكى ءحاديستى ۇشتاستىرا كەلە ءيتتىڭ دە شايتاندى كورگەندە ۇرەتىنىن ۇعىنۋعا بولادى.

[1] ءابۋ ءداۋىد - №5103

[2] ءمۇسليم - 2729؛ بۋحاري - 3303.

ابدۋسامات قاسىم

islam.kz