ەلوردادا مۇقاعاليعا ارنالعان ادەبي- مۋزىكالىق كونسەرت وتەدى
بۇل شارانى استانا قالاسى اكىمدىگىنىڭ مەملەكەتتىك اكادەميالىق فيلارمونياسى اقىننىڭ تۋعانىنا 85 جىل تولۋىنا وراي العاش رەت ۇيىمداستىرىپ وتىر.
استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ باس ديرەكتورى جانە كوركەمدىك جەتەكشىسى ساكەن ءابدىراحمانوۆ اقىننىڭ تۋعان كۇنى قارساڭىندا وسىنداي كەش وتكىزىپ، ەلوردالىق كورەرمەندەرگە ءان مەن كۇيدەن شاشۋ شاشۋ تۋرالى باستاما كوتەرگەن بولسا، ونى قالا اكىمدىگى دە، ونەر ۇجىمى دا بىردەن قولداعان.
وسى كەشتىڭ باسىندا ق ر ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ لاۋرەاتى، اقىن، دراماتۋرگ سەرىك تۇرعىنبەك ۇلى حالقىمىزدىڭ اقيىق اقىنى مۇقاعالي ماقاتايەۆ تۋرالى كىرىسپە ءسوز سويلەيدى دەپ كۇتىلۋدە.
«مۇقاعاليدىڭ كەشىن وركەسترمەن العاش رەت وتكىزگەلى تۇرمىز. اقىن سوزىنە جازىلعان اندەردىڭ نوتالارى وركەسترگە ءتۇسىرىلدى. وسى مادەني شاراعا ۇلكەن دايىندىق جاسالىپ جاتىر. جاڭا شىعارمالار دا ورىندالادى. رۋحاني بايلىقتى قادىر تۇتاتىن كورەمەندەرىمىز ءۇشىن سازدى دا ءماندى كەش بولعالى تۇر»، - دەيدى ديريجەر، كۇيشى، كومپوزيتور، پروفەسسور، ق ر ەڭبەك سىڭىرگەن قايراتكەرى، استانا قالاسى مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترىنىڭ كوركەمدىك جەتەكشىسى جانە باس ديريجەرى ايتقالي جايىموۆ.
تۇرسىنجان شاپايدىڭ «قايران قاراسازىم-اي» دەگەن ءانىن ارمان جايىم وركەسترگە لايىقتادى. ەرمۇرات ۇسەنوۆتىڭ «ۇران» دەگەن كۇيى ورىندالادى.
تانىمال ونەر قايراتكەرلەرى مايرا ءىلياسوۆا، ازامات جىلتىركوزوۆ، بيبىگۇل جانۇزاق جانە فيلارمونيانىڭ باسقا انشىلەرى مۇقاعاليدىڭ سوزىنە جازىلعان اندەردى ورىندايدى. سونداي-اق اقىننىڭ ولەڭدەرى وقىلادى.
كۇيشى ءۋالي بەكەنوۆتىڭ «كۇي اڭساۋ» اتتى كۇيى العاش رەت ورىندالعالى تۇر. ورىندايتىن استانا قالاسى مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترىنىڭ ديريجەرى، مادەنيەت قايراتكەرى - نۇرلان بەكەنوۆ. بىزگە جەتكەن دەرەكتەرگە سۇيەنسەك، مۇقاعالي كۇيدى اڭساعان كەزدە ءۋالي بەكەنوۆكە بارىپ، كۇي تىڭدايدى ەكەن. كەيىن اقىن قايتىس بولعان سوڭ، كۇيشى وعان ارناپ وسى «كۇي اڭساۋ» اتتى كۇيىن شىعارعان. ءۋالي بەكەنوۆ شەرتپە كۇي تۋرالى العاشقى كىتاپ جازعان مۋزىكا زەرتتەۋشىسى ەكەنى بەلگىلى. ونىڭ «كۇي كوتەرەر كوڭىلدىڭ كوك جيەگىن»، «كۇي تابيعاتى»، «شەرتپە كۇي شەبەرلەرى» جانە باسقا زەرتتەۋ ەڭبەكتەرى جارىق كورگەن. ءوزى شەرتپە كۇيدىڭ شەبەرى اتانعان ادام.
اتالعان كەش جۇما كۇنى 19.00 دە باستالادى.
اۆتور: ايدىن بايمەن
