اقىل ءتىستىڭ ماڭىزى
ەرەسەك ادامنىڭ قالىپتى 28 تىسىمەن قوسا، 4 اقىل ءتىسى بولۋى ءتيىس. تىستەر اتقاراتىن قىزمەتتەرىنە قاراي، كەسكىشتەر، ازۋ تىستەر، پرەموليار جانە موليار بولىپ بولىنەدى.
بۇگىنگى قوزعاپ وتىرعان تاقىرىبىمىز - اقىل ءتىستىڭ ماڭىزدىلىعى. ادەتتە 17 مەن 25 جاس ارالىعىندا شىعاتىن بۇل ءتىس ءتۇرى ەرەكشە اۋىرسىنۋمەن شىعادى. دەر كەزىندە بايقالماعان اۋرۋ- سىرقاۋ سيمپتومدارى ودان بەتەر اسقىنۋلارعا اكەلىپ سوعۋ مۇمكىن.
كوپ جاعدايدا، ەڭ سوڭىنان شىققان بۇل تىستەردىڭ تۇبىرلەرى ناشار بولادى. كەيدە ءتىس جەگىنە ۇشىراعان اقىل تىستەردى دارىگەرلەر ەمدەۋدەن باس تارتىپ جاتادى. ەمدەۋگە قيىن سوعاتىن اقىل تىستەردى ساقتاۋ قانشالىقتى ماڭىزدى؟ سونىمەن، اقىل ءتىستىڭ جاقسى- جامان تۇستارىن اجىراتايىق.
اۋىز قۋىسىندا تىستەردىڭ جەتىسپەۋشىلىگى سالدارىنان پروتەز كيۋگە تۋرا كەلەدى. ەگەر، اۋىز قۋىسىندا 6-ىنشى جانە 7- ءىنشى، ياعني اقىل ءتىستىڭ الدىنداعى تىستەر جوق بولسا، پروتەز جاساۋ بارىسىندا قيىندىق تۋۋ مۇمكىن. ال اقىل ءتىستىڭ كومەگىمەن پروتەز بەرىك قوندىرىلادى.
كەيدە اقىل ءتىس دۇرىس شىقپاي، ءتۇبىرى قيسىق بولادى. مۇنداي كەزدە قيسىق شىققان اقىل ءتىس باسقا ساۋ تىستەردى زاقىمداماۋ ءۇشىن جۇلىپ تاستالىنادى. ءتىس شىعۋ بارىسىندا جاڭا تىسكە ورىن جەتپەي جاتسا، اقىل تىستەن ايرىلىۋىڭىز ابدەن مۇمكىن. سونداي- اق، الدىنعى تۇرعان تىستەردى ەمدەۋ بارىسىنا كەدەرگىسى كەلىپ جاتسا، اقىل ءتىستى جۇلدىرعانىڭىز ابزال.
مۇنىمەن قوسا، اقىل ءتىس شىعۋ بارىسىندا ءتىس يەگى دە زاقىمدانۋى مۇمكىن. ءتىس يەگى مەن ءتىستىڭ اراسىندا قابىنۋ پايدا بولىپ، پەريكورونيت اۋرۋىنا شالدىعۋ قاۋپى بار. وسىنداي جاعدايلاردىڭ الدىن الۋ ءۇشىن، دەر كەزىندە ءتىس دارىگەرىنىڭ كومەگىنە جۇگىنىڭىز.
el.kz
