جاس قىتاي تانۋشى- جۋرناليستىڭ «جاھانعا جايلىعان جۇرت» اتتى جاڭا كىتابى جارىق كوردى
قىتاي ەلىنىڭ بىلايعى جۇرت بىلە بەرمەيتىن ۇلگى- ءۇردىسى، قاسيەت- قاعيداسى، سالت- ساناسى، ءداستۇر- داعدىسى ەلەپ- ەكشەلىپ، جيناقتاعى ماقالالارعا وزەك بولعان. الىپ مەملەكەتتەگى قازاق دياسپوراسىنىڭ جاي- كۇيى، تانىمال قانداستاردىڭ تىنىس- تىرشىلىگى جونىندە جان- جاقتى باياندالعان. ون جىلدان بەرى وسى ەلدى مەكەندەپ كەلە جاتقان اۆتور ءوز تانىمىنداعى قىتايدىڭ الەۋمەتتىك بەينەسىن وقىرمانعا كەڭىرەك تانىتادى. تۋعان توپىراعى مەن جۇرگەن جەرىنىڭ جەتىستىكتەرىن سالماقتاپ سالىستىرادى، ساباقتاستىرىپ سارالايدى.
داۋرەن وماروۆ جيىرما جەتى جاستا. شانحاي قالاسىنداعى شىعىس قىتاي عىلىم جانە تەحنولوگيالار ۋنيۆەرسيتەتىنىڭ باكالاۆرياتى مەن ماگيستراتۋراسىن بىتىرگەن. بۇدان بۇرىن «ەرتە تۇراتىن ەل» (2008) جانە «مەرەكەسى مول مەملەكەت» (2010) اتتى تانىمدىق كىتاپتارى جارىق كورگەن. «شابىت» حالىقارالىق جاستار فەستيۆالىنىڭ گران پري جۇلدەسىنىڭ يەگەرى، «دارىن» مەملەكەتتىك جاستار سىيلىعىنىڭ لاۋرەاتى. جيناققا ەنگەن ماقالالاردىڭ ءبارى «ەگەمەن قازاقستان» جانە «ايقىن» گازەتتەرىندە جاريالانعان. ول نەگىزگى قىزمەتىمەن بىرگە وسى باسىلىمداردىڭ سول مەملەكەتتەگى ءتىلشىسى مىندەتىن قوسا اتقارادى.
