قوستانايلىق شەبەر استانانىڭ عيماراتتارىن مونشاقتان جاسايدى - كەسكىن

استانا. قازاقپارات - رۋدنىي قالاسىنىڭ تۇرعىنى باقتىباي كەنجەعۇلوۆتىڭ مونشاقتان ءتىزىپ، ءتۇرلى بۇيىمدار جاساي باستاعانىنا ءبىر جىلدان استى.

مۇمكىندىگى شەكتەۋلى جان ەندى ۇيىرمە اشىپ، ونەرىن تاعدىرلاستارىنا ۇيرەتكىسى كەلەدى. ىسمەردىڭ ەڭ ۇلكەن ارمانى - ەلوردادا وتەتىن ەكسپو-2017 كورمەسىنە قاتىسۋ. مۇقتاجدىق - مىڭ ونەردىڭ اناسى. دەنساۋلىعى سىر بەرگەن باقتىباي كەنجەعۇلوۆ كوڭىلىن اۋلايتىن كاسىپ ىزدەدى. بىردە وڭتۇستىكتەگى سارى اعاش اۋدانىنا جولى ءتۇسىپ، مونشاقتان بۇيىم جاسايتىن شەبەرمەن جولىعىپ، وسى ونەردى ۇيرەندى. قازىر ابدەن توسەلگەن. كەنشىلەر قالاسىندا كادەسىيعا تاپسىرىس بەرۋشىلەر كوبەيىپ كەلەدى، دەپ جازادى 24.kz.

«تۋعان كۇن سياقتى مەرەكەلەرگە ارناپ سومكەلەرگە تاپسىرىس بەرىپ كەتەدى. 11:00 دە باستاسام، ەرتەڭ كەشكە دەيىن دايىنداپ بەرەمىن. بۇدان كوبى 3-4 كۇنگە كەتىپ قالادى. ءبىر گۇلدى تەز ىستەگەندە 20 مينۋتتا بىتىرەمىن»، - دەدى باقتىباي كەنجەعۇلوۆ.

مونشاقتاردى ەسەپپەن ءتىزۋ، قالىپقا كەلتىرۋ، تاستاردىڭ ۇيلەسىمىن تابۋ وڭاي شارۋا ەمەس. تەمىردەي ءتوزىم، ۇشقىر قيال كەرەك. مۇندايدا باقتىبايعا كەلىنشەگى گاۋحار كومەكتەسەدى. ىسمەردىڭ ەڭ ءبىرىنشى سىنشىسى دا، قولداۋشىسى دا جۇبايى. كوز جاۋىن الاتىن ءار بۇيىم كوز مايىن تاۋىسقان جانكەشتى ەڭبەكپەن كەلەدى.

«ءارقايسىسى ءارتۇرلى بولادى. ءبىر قولدان شىقسا دا، باسقاشا بولادى. ەكەۋى بىردەي بولمايدى. بىرىنشىدەن، بۇل ونەر تازا، اسەم، ادەمى كورىنەدى. ءاربىر ىستەگەن زاتى سۇرانىسقا يە»، - دەيدى شەبەردىڭ جارى گاۋھار اليەۆا.

باقتىباي - ەكىنشى توپتاعى مۇگەدەك. كەمتار ەكەنمىن دەپ مەملەكەتكە ماسىل بولاتىن ادامىڭ ول ەمەس. شەبەر كادەسىيدان بولەك ۇلتتىق ناقىشتاعى بۇيىمدار، ەلىمىزدىڭ رامىزدەرىن توقيدى. ولاردىڭ ءبارى بۇگىندە ساۋدالانىپ كەتكەن. قولونەرشى قازاقستاننىڭ ماقتانىشتارىن ەندى حالىقارالىق دەڭگەيدە ناسيحاتتاۋعا ىنتالى.

باقتىباي كەنجەعۇلوۆ، قولونەر شەبەرى:

« اقوردانى ىستەپ كوردىك. ادەمى شىقتى. پيراميدانى ىستەپ كوردىك، ول دا ادەمى شىقتى. ەندىگى ويىم - قازاقستاننىڭ كۋرورتتى ايماقتارىن جاساۋ. سولاردى ەكسپو-2017 كورمەسىنە شىعارۋ»، - دەيدى شەبەر.

قولونەرشى وزبەكستاننان 2000 -جىلى ەلگە ورالدى. العاشىندا وڭتۇستىك قازاقستاندا تۇردى. رۋدنىيعا بەس جىل بۇرىن كوشىپ كەلدى. سودان بەرى پاتەر كەزەگىندە تۇر. جەكە پاتەرگە يە بولسام، مۇمكىندىگى شەكتەۋلى جاندارعا ارناپ قولونەر ۇيىرمەسىن اشار ەدىم، دەيدى ول.