الماتىدا ەرەسەكتەر پەداگوگيكاسى قولعا الىناتىن بولدى

الماتى. قازاقپارات - الماتىدا حالىقارالىق جەڭىمپازدار اكادەمياسىنىڭ ينتەللەكتۋالدىق سپورت كلۋبى جەلىسى اشىلدى.

ونىڭ اشىلۋ راسىمىنە ءار ءتۇرلى سالادا قىزمەت اتقاراتىن 1,5 مىڭعا جۋىق ادام قاتىستى. جەڭىمپازدار اكادەمياسى ادامدى، ادامي قۇندىلىقتاردى ينتەللەكتۋالدى تۇرعىدا دامىتۋعا ارنالعان حالىقارالىق پەداگوگيكالىق ءبىلىم بەرۋ جوباسى. وسىدان 2 جىل بۇرىن ماسكەۋدە اشىلعان بولاتىن.

«اكادەميانىڭ باستى ماقساتى - ەرەسەكتەر پەداگوگيكاسىن دامىتۋ. قازىرگى تاڭدا بالالار، جاسوسپىرىمدەر پەداگوگيكاسى جەتكىلىكتى دامىعانى راس. ال 30-35-40 جانە ودان دا ۇلكەن جاستاعى ادامدارعا ارنالعان پەداگوگيكا الەمدە ءتىپتى جوقتىڭ قاسى. بۇل كەنجە قالعان سالا. ويتكەنى جاھاندانۋ زامانىندا ەرەسەكتەر پەداگوگيكاسى دا وتە قاجەت. قازىر، ءبىز وسى سالانى دامىتۋعا كۇش سالىپ جاتىرمىز. ءبىزدىڭ كوزدەگەنىمىز - ەرەسەكتەرگە ارنالاعان پوزيتيۆتى پەداگوگيكا مەن پسيحولوگيانى دامىتۋ. قازىرگى كەزەڭدە الەمدە، تۇرمىستا ءار ءتۇرلى كۇيزەلىستىك ساتتەر بولىپ تۇرادى. بۇل اسىرەسە ەرەسەكتەردىڭ پسيحيكاسىنا قاتتى اسەر ەتەدى. ادامدار وزدەرىن جالعىز سەزىنىپ، تورىعۋ ساتتەرىن باستان كەشەدى. بۇل ارينە ونداي سىن- ساتتەرگە دايىن ەمەستىكتىڭ سالدارىنان تۋىندايدى. ال ەرەسەكتەرگە ارنالعان پەداگوگيكا كەز- كەلگەن قيىندىق نەمەسە ساتسىزدىك - جاڭا مۇمكىندىكتىڭ، جاڭا جەتىستىكتىڭ باستاماسى ەكەندىگىن تۇسىندىرەدى. سولاردى باسقا قىرىنان تۇسىنۋگە، ءسويتىپ ءوز سالاسىندا بارىنشا تابىستى بولۋعا ىقپال ەتەدى. جالپى، پەداگوگيكا اتاۋلىنىڭ ادامنىڭ ءومىر ءسۇرۋ ساپاسىن جاقسارتۋعا كومەگى وتە زور»، - دەدى جەڭىمپازدار اكادەمياسىنىڭ مەنەدجەرى ەكاتەرينا بەسپياتىح.

سونىمەن قاتار ول بۇل ءبىلىم بەرۋ جوباسىنىڭ ونلاين رەجىمىندە جۇرگىزىلەتىندىگىن جەتكىزدى.

«ەرەسەكتەر پەداگوگيكاسى ادامنىڭ تۇلعالىق قاسيەتىن دامىتۋعا باعىتتالعان. ويتكەنى، ءوز ىسىنە، سوزىنە جاۋاپ بەرەتىن تۇلعا عانا جاۋاپكەرشىلىكتەن قاشپايدى، وزىنە جاۋاپكەرشىلىكتى جۇكتەي بىلەدى جانە سونى ورىنداي بىلەدى. ومىردە ءوزىن جەڭىمپاز سەزىنىپ جۇرەدى. قوعامنىڭ يگىلىگىنە كوپ ەڭبەك سىڭىرە الادى. سوندا ولاردى جەڭىمپاز دەمەي، كىمدى جەڭىمپاز دەۋگە بولادى؟ ال حالىق يگىلىگى ءۇشىن ەڭبەك ەتە الاتىن جەڭىمپاز بولۋ ءۇشىن ميدى دا بۇلشىق ەت سەكىلدى بەلگىلى ءبىر ينتەللەكتۋالدىق جاتتىعۋلارمەن ۇدايى جاتتىقتىرىپ تۇرۋ قاجەت. مۇنى ءبىزدىڭ پەداگوگ ماماندار ونلاين رەجىمىندە جۇزەگە اسىرادى. وقۋ باعدارلامالارى ءبىر ايدان ءبىر جىلعا دەيىنگى ۋاقىتتى الادى. ياعني، تۇپتەپ كەلگەندە ەرەسەكتەر دە ءومىر بويى ءوزىن- ءوزى دامىتۋعا، بىلىمدەرىن تولىقتىرۋعا ۇمتىلۋلارى ءتيىس. بۇل تۇرعىدا پەداگوگيكا مەن پسيحولوگيىنىڭ اتقارار قىزمەتى وتە زور»، - دەدى ە. بەسپياتىح.

ۇيىمداستىرۋشىلاردىڭ ايتۋىنشا، اقپان ايىنىڭ ىشىندە الماتى مەن استانا قالالارىندا جوبا اياسىندا شەبەرلىك سىنىپتارى وتكىزىلەدى.

اۆتور: جاپپاربەرگەن ايبوتا