گۇلزيرا ايداربەكوۆا قايراتتى «ماماسىنىڭ بالاسى» دەپ مۇقاتاتىندارعا جاۋاپ بەردى - كەسكىن
گۇلزيرا ايداربەكوۆا قايرات نۇرتاستىڭ 8 جاستا ساحنادا ءان سالعان ۆيدەوسىن جاريالاپ، مىناداي سوزدەر جازدى: «قايرات 8 جاستا. العاشقى ۇلكەن ساحنادا ورىنداعان ءانى - «انا» انىمەن باستالىپ ەدى. «ماماسىنىڭ بالاسى» دەپ قانشا جەردەن مۇقاتۋ بولسا دا ايتارىم: ءومىر - انا اتاۋلىمەن باستالادى. اناسىنا دەگەن ۇلكەن ماحابباتى مەن قۇرمەت كورسەتە العان بالا جەرىنە دە، ەلىنە دە ۇلكەن قۇرمەتپەن قارايدى دەپ ويلايمىن. مىنا ولەڭ جولدارى ەسىمە ءتۇسىپ وتىر:
اناسىز كەرەك ەمەس تاق تا ماعان،
ادام با انا ءسۇتىن اقتاماعان؟
ادام بوپ جۇرمەسەڭ دە جەر بەتىندە،
انانىڭ ماحابباتىن ساقتاماعان.
ازامات ۇمىتۋعا حاقىڭ بار ما؟
اق ءسۇتىن ەمگەن عالىم، اقىندار دا
كوگىمدە ۇشىپ جۇرگەن باقىت قۇسى
اناسىز، ءسىرا، ماعان جاقىندار ما؟»
ايتا كەتەيىك، كۇنى كەشە قايراتتىڭ «نۇر وتان» پارتياسىنىڭ دەپۋتاتتىققا ۇمىتكەرلەر تىزىمىندە بولۋى كوپشىلىكتىڭ تالقىسىنا ءتۇستى. الەۋمەتتىك جەلىلەردە قايرات دەپۋتات بولسا سۇراقتارعا جاۋاپ بەرۋ ءۇشىن اناسىن وزىمەن بىرگە الىپ جۇرە مە دەگەن مۇقاتۋ پوستتار دا پايدا بولدى. ال قايراتتىڭ ءوزى دەپۋتات بولسام، مادەنيەت پەن قازاق ءتىلى ماسەلەلەرىن كوتەرەتىن ەدىم دەدى تىلشىلەرگە بەرگەن سۇحباتىندا.
