تۇرعىن ءۇي قۇرىلىس جيناق بانكىنىڭ جاڭا باعدارلاماسى قىزىلوردا وبلىسىنان باستاۋ الدى

استانا. قازاقپارات - تۇرعىن ءۇي قۇرىلىس جيناق بانكىنىڭ «ءوز ءۇيىم» دەپ اتالاتىن جاڭا باعدارلاماسى قىزىلوردا وبلىسىنان باستاۋ الدى.

وسى باعدارلاما اياسىندا قىزىلوردا قالاسىندا 40 مىڭ شارشى مەتردى قۇرايتىن 12 كوپقاباتتى تۇرعىن ءۇي سالىناتىن بولادى، دەپ حابارلايدى وبلىس اكىمدىگىنىڭ باسپا ءسوز قىزمەتىنەن.

جاڭا باعدارلامانى بىرلەسىپ جۇزەگە اسىرۋ ماقساتىندا بۇگىن وبلىس اكىمى قىرىمبەك كوشەربايەۆ پەن تۇرعىن ءۇي قۇرىلىس جيناق بانكىنىڭ باسشىسى ايباتىر جۇماعۇلوۆ مەموراندۋمعا قول قويدى.

وسى كەلىسىم نەگىزىندە بۇگىن قالاداعى «سىرداريا» مولتەك اۋدانىنان 100 پاتەرلىك 2 كوپقاباتتى تۇرعىن ءۇيدىڭ العاشقى ىرگەتاسى قالاندى. ال قالعان 500 پاتەردى قۇرايتىن 10 كوپقاباتتى تۇرعىن ءۇي جاڭادان بوي كوتەرەتىن «اراي-3» مولتەك اۋدانىندا سالىنادى. بۇل جىل ىشىندە «ءوز ءۇيىم» باعدارلاماسى ارقىلى 600 قىزىلوردالىق باسپانالى بولادى دەگەن ءسوز.

 «جاڭا باعدارلاما ءبىزدىڭ وڭىردەن باستاۋ الىپ وتىر. سوندىقتان تۇرعىن ءۇي قۇرىلىس جيناق بانكىنىڭ باسشىلىعىنا العىس ايتقىم كەلەدى. وتكەن جىلى وبلىس ورتالىعىندا تۇرعىن ءۇي قۇرىلىسى 8 ەسەگە ارتتى. بيىل دا بۇل جۇمىستار جالعاسىن تاباتىن بولادى. اتقارىلعان جۇمىستاردىڭ ناتيجەسىن حالىق كورىپ وتىر. تەك قانا 2015 -جىلدىڭ وزىندە ءبىز وسى سالاعا 22 ميلليارد تەڭگە ينۆەستيتسيا تارتتىق. بيىل دا بۇل كورسەتكىش كەم بولمايدى»، - دەدى وبلىس اكىمى ق. كوشەربايەۆ.

«تۇرعىن ءۇي جيناق بانكى ارقىلى تۇرعىن ءۇي سالۋ كورسەتكىشى بويىنشا قىزىلوردا وبلىسى ۇزدىك 3-ايماقتىڭ ىشىندە. «ءوز ءۇيىم» باعدارلاماسىن وسى ايماقتان باستاۋىمىزدىڭ دا سەبەبى بار. جەرگىلىكتى باسشىلار قۇرىلىس جۇرگىزۋ ءۇشىن قاجەتتى ينفراقۇرىلىمدى دايىنداپ، بارلىق جاعدايدى جاساپ وتىر. سونىمەن قاتار، ۇيلەردىڭ ساپاسىن دا ۇدايى باقىلاۋدا ۇستايتىن بولامىز»، - دەيدى تۇرعىن ءۇي قۇرىلىس جيناق بانكىنىڭ باسشىسى ايباتىر جۇماعۇلوۆ.

 مۇنان باسقا ءدال وسى كۇنى «وڭىرلەردى دامىتۋ» مەملەكەتتىك باعدارلاماسى اياسىندا «بايتەرەك» ۇلتتىق باسقارۋشى حولدينگى» ا ق- نىڭ قارجىلاندىرۋىمەن «ساۋلەت» مولتەك اۋدانىندا 350 پاتەردى قۇرايتىن 7 كوپقاباتتى تۇرعىن ءۇيدىڭ العاشقى ىرگەتاسى قالاندى. جوبانىڭ جالپى قۇنى 2 ميلليارد 940 ميلليون تەڭگە. وبلىس باسشىسى مەردىگەر مەكەمەگە قۇرىلىستىڭ ساپاسىنا ءمان بەرۋدى تاپسىردى.

قورىتا ايتقاندا، جىل باسىنىڭ وزىندە قىزىلوردادا 19 كوپقاباتتى ترعىن ءۇيدىڭ قۇرىلىسى باستالدى. وبلىس باسشىلىعى بيىل دا 2 مىڭنان استام سىربويىلىق باسپانالى بولادى دەپ جوسپارلاپ وتىر.