بۇكىل الەمدىك بوكس سەرياسى: قانشا قازاق بالاسى جۇدىرىقتاسىپ ءجۇر؟
بۇگىندە التىنشى ماۋسىمنىڭ العاشقى ىرىكتەۋ جارىستارى باستالىپ كەتتى.
2010 -جىلى العاش رەت تۇساۋى كەسىلگەن جوباعا بيىل ايتارلىقتاي وزگەرىستەر ەندى. بۇكىل الەمدىك بوكس سەرياسىنىڭ باسشىلارى جارىسقا قاتىسۋعا نيەت بىلدىرگەن ون التى كوماندانى ءتورت توپقا ءبولدى.
«استانا ارلاندارى» كومانداسى جەرەبە قورىتىندىسى بويىنشا «D» توبىندا ازەربايجان، وزبەكستان جانە پۋەرتو- ريكا كلۋبتارىمەن بىرگە ونەر كورسەتۋدە. كوماندا قۇرامى نەگىزىنەن قازاقتىڭ قارادومالاق ۇلاندارىنان جاساقتالعان.
ايتالىق، 49 كەلىدە ماردان بەرىكبايەۆ، تەمىرتاس ءجۇسىپوۆ، جومارت ەرجان، 52 كەلى سالماقتا ولجاس ساتتىبايەۆ، ازامات يساقۇلوۆ، ازات ماحمەتوۆ، 56 كەلى سالماق دارەجەسىندە مەيىربولات تويتوۆ، نۇربول قالجانوۆ، نۇرسۇلتان كوشەعۇلوۆ، 60 كەلى سالماقتا ەرجان ءمۇسافىروۆ، باقداۋلەت يبراگيموۆ، 64 كەلى سالماقتا سامات باشەنوۆ، اسحات ءۋاليحانوۆ، سابىرجان باقبەرگەنوۆ، 69 كەلى سالماق دارەجەسىندە اسلانبەك شىمبەرگەنوۆ، قاناعات مارالوۆ، 75 كەلى سالماقتا مەيىرىم نۇرسۇلتانوۆ، امانقۇل ءابىلحان، ەرىك ءالجانوۆ، رۋستام سۆايەۆ، 81 كەلى سالماقتا نۇرداۋلەت جارمانوۆ، ارمان رىسبەك، 91 كەلىدە مۇحامەدجان ەركىن، راحمان ءالجانوۆ، ال اسا اۋىر سالماق دارەجەسىندە نۇرسۇلتان امانجولوۆ، قامشىبەك قوڭقابايەۆ، نۇرجان بەكزاتوۆ سياقتى قازاقتىڭ ۇردا- جىق ازاماتتارى بىلعارى قولعابىمەن تالاي شارشى الاڭدا ەل مەرەيىن اسىرىپ، اتوي سالىپ ءجۇر.
«استانا ارلاندارى» ونەر كورسەتەتىن «D» توبىنداعى وزبەكستان قۇراماسىندا تاعى ءبىر قازاقتىڭ قاراكوز ۇلانى شارشى الاڭ كورىگىن قىزدىرۋعا ءازىر.
وزگە ەلدىڭ تۋىنىڭ استىندا ونەر كورسەتەتىن قانداسىمىز وسىعان دەيىن ءبىراز بيىكتەردى باعىندىرىپ ۇلگەرگەن. الداعى ايقاستاردا وتانداستارىنا قارسى جەكپە- جەككە شىقپاق. ونىڭ ەسىمى - ەلنۇر ءابدىرايىموۆ.
ەلنۇر وتكەن جىلى جازدا كاتار استاناسى دوحادا وتكەن بوكستان الەم چەمپيوناتىندا وزبەكستان قۇراماسىنا قولا جۇلدە سىيلاپ قانا قويماي، ريو وليمپياداسىنىڭ جولداماسىندا جەڭىپ العان بولاتىن. بۇگىندە كورشى ەلدىڭ نامىسىن قورعاپ جۇرگەن ول 1994 -جىلى تاشكەنت وبلىسىنا قاراستى بوستاندىق اۋدانىندا دۇنيەگە كەلگەن. ەلنۇر وسىعان دەيىن بىرنەشە حالىقارالىق تۋرنيرلەردە جەڭىمپاز اتانعان.
جالپى، وزبەكستان بوكسشىلارى قانداي جارىس بولماسىن قازاق بوكسشىلارىنىڭ ەڭ مىقتى قارسىلاستارىنىڭ ءبىرى ەكەنىن بىلەمىز. سونداي- اق، بۇكىل الەمدىك بوكس سەرياسى جوباسىنا وزبەكستاندىق بوكسشىلار تۇڭعىش رەت قاتىسىپ وتىر. سوندىقتان، بيىل «استانا ارلاندارى» ءۇشىن ءوز توپتارىنىڭ ۇزدىگى اتانىپ، فينالعا جەتۋى ءۇشىن ايانباي تەر توگۋىنە تۋرا كەلەدى.
ال «ا» توبىندا كۋبا، ۋكراينا، تۇركيا، قىتاي ەلدەرىنىڭ بوكسشىلارى قولعاپ تۇيىستىرەدى. وسى توپتاعى قىتاي قۇراماسىندا تاعى ءبىر قازاقتىڭ ءور مىنەزدى ۇلانى سول ەلدىڭ اتىنان جۇدىرىقتاسۋدى ءجون ساناپتى. ونىڭ ەسىمى - سەرىك تولەۋتاي ۇلى. ول قازىر 22 جاستا. 2013 -جىلى بوكستان قىتاي ۇلتتىق قۇراماسىنا كىرگەن قانات يسلامنان كەيىنگى ەكىنشى بوكسشى. وعان دەيىن قىتاي قۇراماسىنىڭ ساپىندا بولعان قانات يسلام 2008 -جىلى بەيجىڭ وليمپياداسىندا قولا مەدال جەڭىپ العانىن جاقسى بىلەمىز. سەرىك تولەنتاي ۇلى 2013 -جىلى قىتاي چەمپيونى اتانىپ، سول ەلدىڭ اتىنان الماتىدا وتكەن الەم چەمپيوناتىنا دا قاتىسىپ قايتقان بولاتىن. وكىنىشكە قاراي، الاتاۋ بوكتەرىندە وتكەن الاماندا باعى جانبادى. ءبىرىنشى اينالىمنان اسىپ شابا العان جوق- تۇعىن.
ءبىراق، قازاقتىڭ قايسار ۇلانى وعان بولا جاسىپ قالعان جوق، ودان كەيىندە قىتاي قۇراماسىندا جاتتىعا ءجۇرىپ، ميللياردتار اراسىندا ءوز سالماعىنىڭ ۇزدىگى اتانىپ كەلەدى. ول بيىلعى بۇكىل الەمدىك بوكس سەرياسى اياسىندا وتەتىن دوداعا قايتا ورالعان قىتايدىڭ China Dragons كلۋبىنىڭ تولىققاندى مۇشەسى اتانىپ وتىر.
ەستەرىڭىزگە سالا كەتەيىك، WSB جوباسىنا قىتاي ەڭ العاشقى ماۋسىمدا ءبىر جىل ونەر كورسەتتى دە، بەلگىسىز سەبەپتەرمەن 2-3-4-5- ماۋسىمدا جوباعا قاتىسپاعان بولاتىن. مىنە، بيىل 6 ماۋسىمدا قايتادان كوماندا جاساقتاپ، شارشى الاڭعا ەكىنشى مارتە قايتا ورالىپ وتىر.
ال ازىرگە «ۆ» توبىندا مەكسيكا، ماروككو، ا ق ش، ۇلى بريتانيا بوكسشىلارى مەن «س» توبىداعى رەسەي، ارگەنتينا، پولشا، ۆەنەسۋەلا ەلدەرىنىڭ بوكسشىلارى اراسىندا قازاق بوكسشىلارى بار دەگەندى ەستىمەدىك.
مىنە، بۇكىل الەمدىك بوكس سەرياسى جوباسىندا قانشا قازاق ۇلانى جۇدىرىقتاسىپ جۇرگەنىن وزدەرىڭىز ساناي بەرىڭىزدەر. قازاق جىگىتتەرى قايدا جۇرسە دە، الاشتىڭ ابىرويىن اسىرىپ جاتسا، بىزگە ودان ارتىق ماقتانىش جوق. ءار قاشان وسىنداي ۇلاندارىمىزعا قولداۋ كورسەتە بىلەيىك.
ەستەرىڭىزگە سالا كەتەيىك، بۇكىل الەمدىك بوكس سەرياسىنىڭ التىنشى ماۋسىمىنا ارنالعان ەرەجە بويىنشا ءار توپتان ۇزدىك شىققان ەكى كوماندا جارىستىڭ شيرەك فينالىنا شىعادى. توپتىق باسەكەنىڭ جەكپە- جەكتەرى وليمپيالىق اينالىم بويىنشا وتەدى.
كۇنسۇلتان وتارباي
