ايگىلى ءمادي ءباپي ۇلىنىڭ دۇنيەلەرى مۇراجايعا تاپسىرىلدى - فوتو

استانا. قازاقپارات - ءومىردىڭ كوكپارىندا بەلىنەن شوقپارى تۇسپەگەن، ساۋىق-سايراندا ساپتىاياعىنا كوكبۇيرا ناسىبايدى قالامپىردىڭ سۋىنا ۇگىپ، جاس-كارىنى انگە قارىق قىلاتىن ەر ماديدەن مۇرا قالىپتى.

شوقپار مەن ناسىباي ۇككىش ساپتىاياق. جادىگەردى كوزىنىڭ قاراشىعىنداي ساقتاپ كەلگەن قۇدايبەرگەن باكەيەۆ، دەپ جازادى «ورتالىق قازاقستان» گازەتى.

«قاراعاندى وبلىستىق تاريحي- ولكەتانۋ مۇراجايىندا ۇلكەن تاريحي وقيعا بولدى. ناقتىراق ايتساق، اتاقتى قازداۋىستى قازىبەك ءبيدىڭ ۇرپاعى، اقىن، قازاقتىڭ ءان ونەرى مەن ادەبيەتى تاريحىنداعى كورنەكتى وكىل - ءمادي ءباپي ۇلىنىڭ كوزى تىرىسىندە قولدانعان بۇيىمدارى اتالمىش مۇراجاي قورىنا تاپسىرىلدى. ءبىزدى تاريحي ساتكە وبلىستىق تاريحي- ولكەتانۋ مۇراجايىنىڭ جاڭا تاريح ءبولىمى مەڭگەرۋشىسى نۇربولات الدابايەۆ كۋالاندىرىپ، كىشىگىرىم ءماجىلىستى ءماديدىڭ عيبراتتى، قيلى، مۇراتتى عۇمىرىنان سىر شەرتە وتىرىپ اشتى.

قۇندى جادىگەرلەر باسىندا ءماديدىڭ قۋعىندا جۇرگەندە قاسىندا اينىماس سەرىگى بولعان قارقارالى اۋدانى اباي اۋىلىنىڭ تۇرعىنى اكپار سمايىل ۇلىندا بولىپتى. ومىردەن وتەر الدىندا بۇل بۇيىمداردى وزىمەن ءدام- تۇزى جاراسقان ءشايقى اقساقالدىڭ كۇيەۋبالاسى قۇدايبەرگەن باكەيەۆكە تاپسىرىڭدار دەپ ۇرپاقتارىنا اماناتتاپ كەتىپتى. اكپار اقساقال اقتىق ساپارعا 94 جاسىندا 1986 -جىلى اتتانىپتى. اتا اماناتىنا ادال قاراعان قىزى زاعيراش اكەسىنىڭ ءسوزىن جەرگە تاستاماپتى.

«مەن اكپار اقساقالمەن 1969 -جىلدان ارالاسىپ ءجۇردىم. سونداي شەجىرە، اقكوڭىل، اڭگىمەشىل ادام بولدى. مەنەن قارقارالى، پاۆلودار، سەمەي، قاينار جاعىنداعى بۇرىنعى بىلەتىن ادامدارىن سۇرايدى. ارعى-بەرگى تاريحتى اڭگىمە قىلىپ وتىرامىز. شاقشا سالاتىن ادەتىم بار. اقساقال ناسىبايعا باپ ەدى. قالامپىردىڭ سۋىنا ۇككەن ناسىبايىندا ەرەكشە قاسيەت، باپ بار ەدى. سونداي ءبىر اڭگىمە بارىسىندا اقساقال: «ءاي، قۇدايبەرگەن، سەن ناسىباي اتاسىڭ عوي، مەن ولاي-بۇلاي بولىپ كەتسەم (ول كەزدە اقساقال جاتىپ قالعان) ءماديدىڭ مىناۋ شوقپارى مەن ناسىباي ۇككىش ساپتىاياعىن امانات قىلىپ كەتەمىن، بالالار ساعان بەرەر»، - دەدى.

ويىمدا ەشتەڭە جوق، ول كەزدە ءمادي جايلى بۇگىنگىدەي اڭگىمە ايتا العان جوق ەدىك. قىزى زاعيراشقا راحمەت. مارقۇمنىڭ قوناقاسىندا بەردى. كوزىمنىڭ قاراشىعىنداي ساقتاپ كەلدىم. جيىرما جىلداي ناسىباي ۇگىپ اتتىم. قالامگەر كارىم ساۋعابايەۆپەن جولداس بولدىق، ارالاس-قۇرالاسىمىز بار، ۇيگە ەكى رەت كەلدى. «بۇل جادىگەرلەردى مۋزەيگە وتكىزەيىك، وچەرك جازام، اتىڭ شىعادى» دەپ قولقالاپ بولمادى. بەرە المادىم دا، كەيىننەن نەگە كوڭىلىن قالدىردىم ەكەن دەپ وكىنگەن جاي بار»، - دەيدى قارقارالى اۋدانىنىڭ قۇرمەتتى ازاماتى، جادىگەردى ساقتاۋشى قۇدايبەرگەن باكەيەۆ.