ءاليحان بوكەيحانوۆتىڭ ەمەننەن ويىلىپ جاسالعان ەتتاباعى تابىلدى
«اقتوعايدان قوڭىراۋ شالدى. ءانيشا جاسىمبەك قىزى ەكەن. ءاليحان بابامىزدىڭ ۇرپاعى. بوكەيدىڭ توعىز ۇلىنىڭ ءبىرى باتىردان مىرزاتاي مەن رۇستەم تۋادى. مىرزاتايدان نۇرمۇحامەد بالالارى ءاليحان، سماحان تۋسا، رۇستەمنەن بەگەتاي بالاسى جاسىمبەك تۋادى.
كەڭەستىك وكىمەتتىڭ كومۋسىز قالعان ءاليحانعا جوقتاۋ ءسوزدى دە قيماعانى بەلگىلى. سماحان تورە تالدىبەيىتكە تاس قويعاندا ءاليحانعا ارنالعان قۇلپىتاستاعى جازۋدى ناق وسى جاسىمبەكتىڭ قولىمەن وشىرتەدى. نە دەگەن سۇرقاي ساياسات ەدى؟! الەكەڭنىڭ ءبىر باۋىرى جانىن جالداپ ءجۇرىپ قۇلپىتاس قويادى، تاعى ءبىر باۋىرى سونداعى ەستى ءسوزدى قولى دىرىلدەپ وتىرىپ وشىرەدى...
بۇل كەزدە جاسىمبەك اعا جىڭىشكە بويىنداعى ءبىرىنشى بولىمشەدە تۇرىپتى. قۇلپىتاستى ال دەپ بۇيىرعان عوي قىزىل كوممۋنيستەر. ءارى ويلاپ، بەرى ويلاپ جاسىمبەك اعا ءبىر امالىن تاپقان. اتاربامەن بارىپ، قۇلپىتاستاعى جازۋدى سىلاپ تاستاعان. قىزىل كوممۋنيستەر قالاي دەسە دە قۇلپىتاستى المايدى.
ءبىر جاقسى كۇننىڭ كەلەتىنىنە سەنگەن عوي. وكىنىشتىسى، ول كىسى سول جاقسى كۇنگە جەتە المادى. 1980 -جىلى باقيلىق بولىپتى.
سول سىلاق 1992 -جىلى اقتوعايدا ءۇش ارىستىڭ تويى تويلانعاندا الىنعان عوي. سونداعى باقىتتى جانداردىڭ ءبىرى وسى ءانيشا اپايىمىز بولىپتى. بۇل اۋلەت تە قۋعىن- سۇرگىندى كورىپ باعادى. الايدا بۇل اتانىڭ ۇرپاعى ازاتتىق رۋحىن ارقالاپ ەرتەڭىنە جوڭكىگەن ۇلى كوشتەن قالمايدى.
ءانيشا اپايىمىز - سول تەكتى ۇرپاقتىڭ جۇقاناسى. قىرىق جىلعا تارتا مەكتەپتە ۇستاز بولعان. الدىنان مىڭداعان شاكىرت وربىتكەن. ءاليحان بابامىزعا قاتىستى اقتاڭداقتارعا ءبىر ساۋلە تۇسىرۋگە ۇمتىلعان جانداردىڭ ءبىرى. ونداي جازبالارى قازاق باسپا سوزىندە جاريالانىپ ءجۇر.
- ءاليحان اتامنان ءبىر جادىگەر قالىپ ەدى...
مەن ءتىلىمدى تىستەيىن.
- ءاليحان اتامىزدان قالعان قۇندى جادىگەر - ەمەننەن ويىلىپ جاسالعان كادىمگى ەتتاباق. بۇل تاباقتى بابامىز مەنىڭ اجەم ساقىپقا اكەپ بەرگەن. عاسىردان اسا ساقتالعان قۇندى جادىگەردى قالىمحان شەشەم بۇگىنگى كۇنگە دەيىن ساقتاپ كەلدى.
اپايدىڭ جاقسى حابارىنا جانىم سەمىرىپ قالا بەردىم. تاعى دا حابارلاساتىنىن ايتتى. جاقسى حابارمەن»، - دەپ جازادى باسىلىم.
