قازاقستاندىق بوكسشى كاسىپقوي رينگتە ءوزىنىڭ العاشقى سايىسىن جەڭىسپەن اياقتادى
العاشقى سايىستا 69 كەلى 850 گرامم سالماق دارەجەسىندە شارشى الاڭعا قازاقستاندىق بوكسشى بەرىكباي نۇرىمبەتوۆ پەن گرۋزيالىق الەكساندر بەنيدزە شىقتى. ءتورت راۋندقا سوزىلعان سايىس ناتيجەسى بويىنشا (26-40, 36-40, 37-39) ۇپاي سانىمەن قازاقستاندىق بىلعارى قولعاپ شەبەرى جەڭىسكە جەتتى.
ەكىنشى سايىستا 55 كەلى 340 گرامم سالماق دارەجەسىندە كەشە 23 جاسقا تولعان رەسەيلىك قانداسىمىز ەرجان زاليلوۆ (كوكشەتاۋ قالاسىنىڭ تۋماسى) قازاقستاندىق نۇرسۇلتان قابىلوۆپەن كەزدەسكەن بولاتىن. ەكىنشى راۋندتا جەرلەسىمىز باۋىرىنان سوققى الىپ، نوكداۋنعا ءتۇسىپ قالدى. ءۇشىنشى راۋندتا سول جاق قۇلاق شەكەسىنەن تاعى ءبىر اۋىر سوققى جىبەرىپ العان جەرلەسىمىز ەكىنشى رەت نوكداۋن الدى.
سوڭعى راۋندتا تاعى دا نوكداۋنعا تۇسكەن سوڭ، تورەشى دارىگەرمەن اقىلداسا كەلە سايىستى توقتاتتى. وسىلايشا، رەسەيلىك بوكسشى ەرجان زاليلوۆ تەحنيكالىق نوكاۋتپەن جەڭىسكە جەتتى. ءۇشىنشى سايىستا 61 كەلى 230 گرامم سالماق دارەجەسىندە وتانداسىمىز ازامات نۇركەيەۆ رەسەيلىك الەكساندر پودولسكيمەن قولعاپ ءتۇيىستىردى. التى راۋندقا سوزىلعان بوكس دوداسى اسا تارتىستى باستالدى. دەگەنمەن، رەسەيلىك بوكسشى ءۇشىنشى راۋندتا تەحنيكالىق نوكاۋتپەن جەڭىسكە جەتتى. ازامات مۇرنىنان جاراقات الىپ قالدى.
ءتورتىنشى كەزدەسۋ 72 كەلى 570 گرامم سالماق دارەجەسى بويىنشا قازاقستاندىق بوكسشىلار تەمىرلان رايىمقۇلوۆ پەن ارتەم بوتسۋنوۆپەن اراسىندا ءوتتى. التى راۋندتىق سايىستا ۇپاي سانىمەن (57-57, 56-57,59 55) ەكى بوكسشى دا تەڭ ونەر كورسەتتى دەپ جاريا ەتىلدى.
بەسىنشى سايىستا وسى سالماق دارەجەسىندە قازاقستاندىق ايدوس ەربوسىن ۇلى رەسەيلىك دميتريي انتيپوۆپەن قولعاپ تۇيىستىرگەن بولاتىن. وتانداسىمىز ءبىرىنشى راۋندتىڭ 1 مينۋت 56- سەكۋندىندا قارسىلاسىن باۋىردان ۇرىپ، نوكاۋتقا جىبەردى.
بۇگىنگى كەشتىڭ ەڭ سوڭعى جانە باستى سايىسىندا ەڭ اۋىر سالماق دارەجەسى بويىنشا بەلگىلى قازاقستاندىق بوكسشى رۋسلان مىرساتايەۆ العاشقى رەت كاسىپقوي رينگتە رەسەيلىك بىلعارى قولعاپ شەبەرى ۆالەري زاميرالوۆپەن كەزدەستى. ايتا كەتەلىك، تارازىعا ولشەنۋ بارىسىندا رەسەيلىك بوكسشى قازاقستاندىق قارسىلاسىنان 18 كەلىگە اۋىر بولعان ەدى.
وتانداسىمىز ءبىرىنشى راۋندتا تەحنيكالىق نوكاۋتپەن جەڭدى. سايىس بار بولعانى 2 مينۋت 38 - سەكۋندقا عانا سوزىلدى.
ايتا كەتەلىك، بوكس دوداسىن كورۋگە كەلگەن 600 دەن استام كورەرمەن بوكسشىلارعا قىزۋ قولداۋ كورسەتىپ وتىردى.
بوكس كەشىن ۇيىمداستىرۋشىلار - قازاقستاننىڭ كاسىپقوي بوكس فەدەراتسياسى مەن «BM Global» جانە Diamond Ring ج ش س.
اۆتور: جاپپاربەرگەن ايبوتا
