رەسەي ەلىكتەرى قازاقستانعا قاراي اعىلۋدا

استانا. قازاقپارات - جان- جانۋارلاردىڭ ءورىسىن وزگەرتۋىنە قىستىڭ قاتال مىنەزى سەبەپ بولعان.

ەلىكتەر قالىڭ قاردان ازىق تاپپاي، جازىق جەر ىزدەگەن كورىنەدى. ولاردىڭ ءبىر لەگى پەتروپاۆلداعى قورىقتارعا كەلىپ قوسىلدى، دەپ حابارلادى www.24.kz.

ەن دالانىڭ ەركە ەلىكتەرى دميتري كاتالكيننەن قورىقپايدى. قايتا قولىنان قورەكتەنىپ، قاسىنان شىقپايدى. قورىقشى دا جابايى جانۋارلاردى جاقىن كورىپ كەتكەن.

«ايازدى كۇندەرى ۇيدە وتىرا المايمىز.  40- گرادۋستا جەم- ازىقتى تاڭەرتەڭ جانە كەشكە جەتكىزەمىز. سۋىقتا جابايى جانۋارلاردىڭ قورەكتەنۋى ودان سايىن قيىنداپ كەتەدى»، - دەيدى قورىقشى دميتري كاتالكين.

ءتۇز تاعىلارىنىڭ جەگەنى الدىندا، جەمەگەنى ارتىندا. قورىقشىلار جان-جانۋارلارعا جەم-ءشوپ، قايىڭ جاپىراقتارى مەن تۇز-بورلارىنا دەيىن دايىنداپ قويعان. بۇل دالا اڭدارىنىڭ قىستان قىسىلماي شىعۋىنا مۇمكىندىك بەردى. وسى جىلى سولتۇستىك قازاقستان وبلىسىندا قار قالىڭ جاۋدى. بۇل جابايى جانۋارلاردىڭ قورەكتەنۋىن ەداۋىر قيىنداتىپ جىبەردى. سوندىقتان قورىقشىلار ارنايى تەحنيكالارمەن القاپتاردى قاردان ارشىپ، وسىنداي جولدار سالىپ بەرۋدە. قورىقتى قىزىل كىتاپقا ەنگەن 1800 دەن استام ەلىك- بۇعى مەن 500 دەي قابان مەكەن ەتەدى. ولارعا رەسەيدەن كەلىپ جاتقان جان- جانۋارلار قوسىلدى. الىستان اعىلعان اڭدار اش.

«رەسەي جاقتان 100-200 ەلىكتەن كەلىپ جاتىر. ويتكەنى قار قالىڭ، جەم- ازىق جەتىسپەيدى. سوندىقتان قورەك ىزدەپ، جۇرە بەرەدى. كوبى جولدا جۇدەپ، ءولىپ تە قالادى. جەتكەندەرىن قامقورلىققا الامىز»، - دەيدى «كراسنىي بور» قورىعىنىڭ ديرەكتورى نيكولاي گۋسەلنيكوۆ.

قامقورلىققا الىپ قانا قويماي، قاۋىپسىزدىگىن قامتاماسىز ەتەدى. جابايى جانۋارلاردىڭ جاناشىرلارى كۇنى-ءتۇنى كوز ىلمەيدى. ويتكەنى سايىن دالادا ساۋىق قۇراتىن سۇعاناقتاردىڭ بەس قارۋى قاشان دا ساي.