جول اپاتىنان امان قالعان جۇلدىزدار - فوتو

استانا. قازاقپارات - اپات ايتىپ كەلمەيتىنى بەلگىلى. توسىننان كەلگەن قۇبىلىستان امان قالىپ، تاۋبە ەتكەننەن باسقا شارا جوق. ءومىرىنىڭ كوپ بولىگى ساحنا مەن جول ۇستىندە وتەتىندىكتەن دە، ونەر ادامدارى جول سىناعىنا ءجيى ۇشىرايدى.

كونسەرت پەن تويعا اسىعامىن دەپ تالاي جۇلدىز فاني جالعانمەن دە قوش ايتىسقان. اللانىڭ قالاۋىمەن امان قالعان جۇلدىزداردى بۇگىن تىزبەلەپ كورگەن ەدىك.

وسىدان ەكى جىل بۇرىن نۇرجان كەرمەنبايەۆ پەن "اراي" توبى اپاتقا ۇشىراعان بولاتىن. قىستىڭ قاقاعان كۇندەرىنىڭ بىرىندە ولار تاراز قالاسىن بەتكە الادى. جەردىڭ كوكتايعاق بولۋى جول ساپارعا ەداۋىر كەدەرگىسىن تيگىزەدى. اقىرى، دىتتەگەن جەرگە جەتۋگە ساناۋلى شاقىرىمدار قالعاندا، كولىك اپاتقا ۇشىراعان. ايتەۋىر، ۇشەۋى دە جەڭىل جاراقاتتانىپ، امان قالادى. ءبىراق، بەلگىلەنگەن كونسەرتتىڭ ۋاقىتىنان كەشىگىپ، حالىقتىڭ نارازىلىعىنىڭ استىندا قالعان.

 2009 -جىل. جاز ايى. شيەلى اۋدانى ماڭىنداعى تاس جولدا جاس ءانشى ءنابي ايمۇراتوۆ پەن ەركىن نۇرجانوۆتىڭ كولىك اپاتىنا ۇشىراۋى كۇللى حالىقتى دۇرلىكتىردى. وكىنىشكە وراي، ونەر كوگىندە شولپان جۇلدىزداي جارق ەتكەن ءنابي اپات ورنىندا كوز جۇمدى. كولىكتىڭ ارتقى سالونىندا وتىرعان ەركىن نۇرجانوۆتىڭ قابىرعالارى سىنىپ، جەدەل اۋرۋحاناعا جەتكىزىلگەن. ءانشىنىڭ دەنساۋلىعى 2-3-اي دەگەندە بارىپ، ازەر قالپىنا كەلدى.

 وسى جىلدار ارالىعى قازاق ونەرى ءۇشىن قايعىلى كەزەڭ بولعانى راس. تانىمال ءانشى نۇرجان قالجان مەن بەلگىلى تەلەجۇرگىزۋشى رۋسلان بولەباي الماتىدا گاگارين كوشەسىنىڭ بويىندا وزگە كولىكپەن سوقتىعىسىپ، ءىرى اپاتقا ۇشىرايدى. ابىروي بولعاندا موينىنان جاراقات العان نۇرجان قالجاننىڭ كورەر جارىعى بار ەكەن. ال، تالانتتى جۇرگىزۋشى رۋسلان، كولىك ىشىندە قازا تاپتى. وسىدان كەيىن ۇزاق ۋاقىت ونەرىنە دەمالىس جاريالاپ، ەم قابىلداعان نۇرجان كولىكتىڭ رولىنە دە ءبىر جىل بويى وتىرماپتى. سۇحباتتارىنىڭ بىرىندە، ءانشى كولىككە ءجاي وتىرۋدىڭ وزىنە قورقىپ قالىپپىن دەگەن بولاتىن.

 بىلتىرعى جىلدىڭ ەڭ وقىس وقيعالارىنىڭ ءبىرى، "ازيا" توبىنىڭ ءانشىسى رينات باسيتوۆتىڭ جول اپاتىنا ءتۇسىپ، اۋىر جاعدايعا ۇشىراۋى. كەزەكتى اندەرىنىڭ بىرىنە كليپ تۇسىرگەن توپ مۇشەلەرى الماتىعا قايتىپ كەلە جاتادى. رينات رولدە وتىرعان كولىكتە توپ مۇشەسى نۇرسۇلتان دا بولعان. ال ەربول وزگە كولىكپەن كەيىندەۋ كەلە جاتىپتى. بىرنەشە كۇنگە سوزىلعان جۇمىستان ابدەن قالجىراعان ريناتتىڭ بىرەر سەكۋند كوزى ءىلىنىپ كەتەدى. وسى كەزدە قارسى بەتتە كەلە جاتقان تەمىر تىركەمەسى بار كاماز جۇك ماشيناسىنا قالاي جاناسقانىن دا بايقاماي قالعان. ودان كەيىنگىنىڭ ءبارى بۇلىڭعىر. كولىكتەردىڭ سوقتىعىسى. ەستەن تانۋ. رينات ەسىن اۋرۋحانا پالاتاسىندا جيناعان. ال نۇرسۇلتان كولىكتىڭ ارتقى بولىگىندە وتىرعاندىقتان، جاراقات الماعان. ماشينانىڭ ءتىپتى ساۋ- تامتىعى قالماعان. وسى وقيعادان كەيىن رينات، ءوزىنىڭ ومىرگە دەگەن كوزقاراسى وزگەرگەنىن، ەندى جاقىندارىن، كەلىنشەگى مەن بالاسىن بۇرىنعىدان دا ەرەكشە قادىرلەيتىنىن ايتقان ەدى.

 مۇنداي سىناق قايرات نۇرتاستى دا اينالىپ وتپەپتى. اناسى گۇلزيرا ول ءبىر اۋىر كەزەڭ بولعانىن، «وكىنىش» فيلمىندەگى جول اپاتىنىڭ دا قايراتتىڭ ومىرىنەن الىنعان وقيعا ەكەنىن ايتادى. ءتىپتى، قايراتتىڭ جانارىنا جاراقات ءتۇسىپ، كوزىنىڭ قاسىندا تىرتىق تا قالعان. ءانشىنىڭ سوڭعى جىلدارى كوزىلدىرىك تاستامايتىنىڭ دا ءبىر سەبەبى سول ەكەن.

 «وردا» توبىنىڭ ءانشىسى داستان ورازبەكوۆ وتكەن جىلدىڭ وزىندە ونشاقتى جول- كولىك وقيعاسىنا تاپ بولىپتى. سونىڭ ىشىندەگى ءىرىسى قورداي اسۋىندا بولعان اپات ەكەن. ءبىر قاراعاندا، ءانشى قاتتى دا جىلدامدىقپەن كەلە جاتپاعان. الايدا مۇز ايدىنى سەكىلدى بولىپ جاتقان جولدىڭ ۇستىندە ابايسىزدا تەجەگىشتى قاتتى باسىپ قالىپ، كولىك ءبىر ورىندا شىر اينالادى. سوسىن جول جيەگىنە قاراي جىلجىپ كەتكەن. ابىروي بولعاندا، كولىك سايعا ءتۇسىپ كەتپەي توقتاپ ۇلگەرىپتى. ءتۇن ورتاسىندا، قىس ايىندا داستان قولىن سەرمەپ كولىك توقتاتۋعا ءماجبۇر بولادى. الايدا ۇزاق ساپارلاپ بارا جاتقانداردىڭ ەشقايسىسى قايىرىلمايدى. اقىرى داستان سول جولى كولىكتى ءوزى جوندەگەن.

 ءانشى نۇرلان البان دا ءومىر مەن ءولىم ارپالىسىن باستان وتكىزگەن. قازىر نۇرلان سول ءساتتى ەسكە العىسى دا كەلمەيدى ەكەن. 2000 -جىلدارى بولعان اپات كەزىندە، ونىڭ مىنگەن كولىگى جول جۇرۋگە جارامسىز بولىپ قالعان. ءتىپتى، قارسى تاراپ جول- كولىك وقيعاسىنا نۇرلاندى كىنالى دەپ، وقيعانىڭ ارتى ءبىراز داۋعا دا ۇلاسىپتى. ءبىراق، سول كەزدەردە ءانشى، وتاندىق تەلەارنالاردىڭ بىرىندە تەلەجۇرگىزۋشى بولىپ قىزمەت اتقارىپ جۇرەدى. نۇرلاننىڭ كىناسىزدىگى دالەلدەنىپ، اقتالىپ شىعۋىنا جۋرناليستەر قاۋىمى دا ۇلكەن ۇلەس قوسىپتى.

 تاراز قالاسىنا ىسساپارمەن بارعان نۇرلان ەسپانوۆ، جول وقيعاسىنىڭ كەسىرىنەن سىنعان كولىگىن بولماشى اقشاعا سوندا ساتىپ قالدىرىپتى. ءانشى مىنگەن كولىك ساعاتىنا 150 شاقىرىم جىلدامدىقپەن قاتتى كەلە جاتادى. ال بەس بالا مىنگەن كولىك جارىعىن جاقپاي كەلە جاتىر ەكەن. ولار تۋرا جاقىنداعان ساتتە فارىن جاعىپ قالىپ، نۇرلان كولىگىن تىزگىندەپ ۇلگەرە الماي قالادى. ايتەۋىر، ءىنىسى باسىنان جەڭىل جاراقاتتانىپ، ءوزى قولىنىڭ سۇيەگىن شىعارىپ الا جازداپ امان قالادى.

  كولىك تىزگىنىندە كەلە جاتىپ ۇيىقتاپ كەتىپ، جول اپاتىنا ۇشىراعانداردىڭ ءبىرى -  ءومىرقۇل اينيازوۆ. بىرەر ساتتىك عانا باسىڭنان وتە شىعاتىن سونداي جاعدايدا، ادامنىڭ ميى قالىپتان تىس تەز جۇمىس ىستەپ كەتەتىنە ءانشى قازىر تاڭ قالادى. 8 - ناۋرىز كۇنگى كونتسەرتىنە قاتىسۋ ءۇشىن جولعا شىققان ءومىرقۇل، كوكتايعاقتىڭ كەسىرىنەن تاس جولدان ۇشىپ كەتكەن.

Stan.kz