بۇركىت اياعان: پارلامەنتكە ويى ۇشقىر، ەگەمەندىكتى، ەلدىكتى قىزعىشتاي قورعايتىن جۇرەكتى ازاماتتار كەلگەنى دۇرىس
«جاڭاشىل ويلايتىن، جاڭاشىل ءبىلىمى بار، جاڭاشىل كوزقاراسقا يە ازاماتتاردى، بىلىكتى مامانداردى پارلامەنتكە اكەلۋىمىز كەرەك، سەبەبى پارلامەنت زاڭ شىعارۋشى ەڭ جوعارى ورگان عوي. اۋمالى-توكپەلى زامان قازىر، بۇل قۇبىلىس كەمىندە ءتورت-بەس جىل بولاتىن سەكىلدى. وسى كەزدە تەز ويلايتىن، تەز شەشىم قابىلدايتىن وتانشىل ازاماتتار كەلەدى دەگەن ويدامىن جانە بۇگىنگى مىنا سەز جاڭا فورماتتاعى، جاڭا دەپۋتاتتىق كورپۋس قالىپتاستىرۋمەن ەرەكشەلەنەدى»، - دەدى ول بۇگىن «نۇر وتان» ساياسي پارتياسىنىڭ كەزەكتەن تىس XVII سەزىندە.
ونىڭ پىكىرى بويىنشا، بەسىنشى شاقىرىلىمداعى پارلامەنت ءماجىلىسىنىڭ دەپۋتاتتارى ءوزىنىڭ الەۋەتىن سارقىپ ءبىتتى جانە وزىنە تاعىلعان مىندەتتى تولىقتاي اتقارىپ بولدى.
«مەن مىسالى، بۇرىنعى دەپۋتاتتىق قۇرامنىڭ كوبىمەن جاقسى تانىسپىن، بىرگە جۇمىس ىستەدىك، ولار ەلدىڭ دامۋىنا قاجەتتى ماڭىزدى زاڭداردى قابىلدادى. ءبىراق ەلدى الىپ كەتەتىندەي ۇلكەن ءبىر قوزعالىسقا كەلە المادى دەگەن ويدامىن. كوپ دەپۋتاتتار ۇندەمەي وتىرادى. دەپۋتات حالىق وكىلى بولعاندىقتان، سويلەپ تۇرۋى كەرەك. كەم دەگەندە تەك بەس-ون دەپۋتات ەسكە تۇسەدى. ولاردىڭ كوبى - عالىمدار. سوندىقتان وسى جاس دەپۋتاتتار كەلگەنى دۇرىس. ويى ۇشقىر، ەگەمەندىكتى، ەلدىكتى قىزعىشتاي قورعايتىن جۇرەكتى ازاماتتار كەلۋى كەرەك»، - دەپ ءسوزىن اياقتادى ب. اياعان.
ەسكە سالا كەتەيىك، كەشە استانادا وتكەن «نۇر وتان» ساياسي پارتياسىنىڭ كەزەكتەن تىس XVII سەزىندە ءماجىلىس دەپۋتاتتىعىنا ۇمىتكەرلەردىڭ پارتيالىق ءتىزىمى بەكىتىلدى. وعان رەسپۋبليكاعا بەلگىلى ساياساتكەرلەر، قوعام قايراتكەرلەرى، سپورتشىلار مەن ونەر يەلەرى ەندى.
اۆتور: جاسۇلان جولدىبايەۆ
