ۇلتتىق مۋزەيدە قازاقتىڭ ۇلتتىق تاعامدارىن زەرتتەيتىن لابوراتوريا اشىلادى
بۇل تۋرالى بۇگىن اكادەميك تورەگەلدى شارمانوۆپەن كەزدەسۋ كەزىندە ۇلتتىق مۋزەيدىڭ ديرەكتورى دارحان مىڭباي ايتتى، دەپ حابارلايدى kazmuseum.kz سايتى.
اكادەميك ت. شارمانوۆتىڭ ايتۋىنشا، مۋزەيدەگى ۇلتتىق تاعامدار ەكسپوزيتسياسىندا جىلقى ەتى مەن ساۋمالى جانە قىمىزى كەڭىنەن ناسيحاتتالۋ كەرەك.
«جىلقىنىڭ ساۋمالى تەرى اۋرۋلارىنا ەم. وسىنى بىلگەن قازاقتار ساۋمال ءىشىپ، تەرى اۋرۋلارىمەن اۋىرماعان. قازاقتار كوڭىل كوتەرۋ ءۇشىن دە قىمىز ىشكەن. بابىنا كەلگەن قىمىزدا ادامعا راحات سىيلايتىن دارۋمەندەر بار. ءتىپتى، ورىس جازۋشىسى ليەۆ تولستوي ايەلىمەن رەنجىسكەن كەزدە ۇيىنەن كەتىپ قالىپ، اپتالاپ قىمىز ءىشىپ جاتادى ەكەن. ل. تولستوي قىمىزدىڭ جۇيكەنى تىنىشتاندىراتىن قاسيەتى بار ەكەنىن بىلگەن. وسىنداي دەرەكتەردى ەسكەرە وتىرىپ، قىمىزعا ەرەكشە ءمان بەرۋ كەرەك. ءبىز قازىرگى ۋاقىتتا ساۋمالدان بالمۇزداق جاساپ شىعاردىق. جاستار وسى بالمۇزداقتى جەسە، ءتۇرلى ەكولوگياىق اۋرۋلارمەن اۋىرماس ەدى»، - دەدى ت. شارمانوۆ.
اكادەميكتىڭ سوزىنە مۋزەي ديرەكتورى دارحان مىڭباي پىكىرىن ءبىلدىردى. «ۇلتتىق مۋزەي قازاقتىڭ ۇلتتىق تاعامدارىن زەرتتەيتىن بولادى. بۇل ىسكە تورەگەلدى شارمانوۆ اعامىز باسقارىپ وتىرعان تاعام تانۋ اكادەمياسى كەڭەسشى بولادى»، - دەدى د. مىڭباي.
ايتا كەتەيىك، ۇلتتىق تاعامداردى زەرتتەۋ ءىسىن «حالىق قازىناسى» ينستيتۋتىنىڭ ديرەكتورى اقان وڭعار ۇيىمداستىردى.
