شىعىس قازاقستاندا بۇركىتشىلەر بىرىنشىلىگى ءوتىپ جاتىر
جارىسقا استانا قالاسى مەن ەلىمىزدىڭ 10 وبلىسىنان كەلگەن قۇسبەگىلەر قاتىسۋدا، دەپ حابارلايدى egemen.kz.
ونىڭ ىشىندە قانسوناردى قىزىقتاعان جۇرتشىلىق 29 بۇركىت پەن 4 قارشىعانىڭ ونەرىن تاماشالاۋدا. التاي-تارباعاتاي ەلىندە تۇڭعىش رەت ۇيىمداستىرىلعان بۇركىتشىلەر فەستيۆالى ماقانشى اۋىلىنىڭ ىرگەسىندەگى جايتوبەدە ءوتىپ جاتىر.
«قازاقستاندا ۇلتتىق سپورت تۇرلەرى كەڭىنەن دامىپ كەلەدى. تاۋەلسىزدىگىمىزدىڭ ارقاسىندا ۇلتتىق ويىندارىمىز بەن ونەرىمىز قايتا جاڭعىرۋ ۇستىندە. بۇركىتشىلەر مەرەكەسى شىعىس وڭىرىندە، اباي ەلىندە تۇڭعىش رەت ۇيىمداستىرىلىپ وتىر. بۇل شارانى جوعارى دەڭگەيدە وتكىزۋگە قازاقستان بۇركىتشىلەر وداعىنىڭ مۇشەسى، ۇلتتىق ونەردىڭ مايتالمان شەبەرى تاتتىمبەت كاپ ۇلى باستاعان ءۇرجارلىق جەرلەستەرىمىز ۇلكەن ۇلەس قوسۋدا. اتا-بابامىزدان قالعان مۇرانى ۇلىقتاۋعا ەلىمىزدىڭ 11 وڭىرىنەن كەلگەن بۇركىتشىلەرمەن بىرگە ءۇرجار اۋدانىنىڭ قۇسبەگىلەرى دە اتسالىسىپ جاتىر. كەلەشەكتە قۇسبەگىلىك، بۇركىتشىلىك ونەردى ودان ءارى ورىستەتە ءتۇسۋ ماقساتىندا بۇل شارانى وڭىرلىك دەڭگەيدە جالعاستىرۋدى كوزدەپ وتىرمىز»، - دەدى اتالعان شارانىڭ وتۋىنە قولداۋ كورسەتكەن ءۇرجار اۋدانىنىڭ اكىمى سەرىك زاينۋلدين.
ايتا كەتكەن ءلازىم، بۇركىتشىلەر باۋاشارىنا ەلىمىزدىڭ ۇلتتىق تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلەن وسپانوۆ، «قىران» فەدەراتسياسىنىڭ اتقارۋشى ديرەكتورى باعدات مۇپتەكە قىزى، مادەنيەت جانە سپورت مينيسترلىگىنىڭ ۇلتتىق سپورت پەن ساياتشىلىقتان باس جاتتىقتىرۋشىسى بازاربەك كۇنتۋعان جانە بەلگىلى قۇسبەگىلەر مەن سىنشىلار قاتىسۋدا. جارىستىڭ العاشقى كۇنىندە بۇركىتشىلەردىڭ كيىمى، ات ابزەلدەرى تەكسەرىلدى. ۇلتتىق ناقىشتا تىگىلىپ، ويۋ-ورنەكتەرمەن بەزەندىرىلگەن ساپتاما ەتىك، قىسقا تون، قالىڭ شالبار، بۇركىتشى بيالايى، شىرعا بالداق، توماعا، ەر قارۋى - پىشاق، قۇستىڭ جەمساۋىتى سەكىلدى بارلىق قۇسبەگىنە قاجەتتى قۇرال-جابدىقتارى نازارعا الىنىپ، بۇركىتتىڭ تۇرپاتى مەن بۇركىتشىنىڭ كيىمى باعالاندى. بۇدان سوڭ سايىستىڭ قۇستى قولعا شاقىرۋ، شىرعا تارتۋ، ەركىن ۇشۋ كەزەڭدەرىنە دە كەزەك جەتىپ، ساياتشىلار قىران قۇستارىنىڭ بابى قالاي ەكەنىن كورسەتتى. جارىستى ۇيىمداستىرۋشىلاردىڭ ايتۋىنشا، بۇل ءار وڭىردەن كەلگەن قىران بۇركىتتەر مەن قارشىعالاردىڭ جەرگىلىكتى جەر جاعدايى مەن تابيعات رايىنا بەيىمدەلۋىنە دە كومەكتەسەدى.
جارىستىڭ ەكىنشى كۇنى بۇركىتتەردىڭ اڭعا شالىمدىلىعى سىنعا ءتۇسىپ، شىن مانىندەگى قان قىزدىرار سالبۋرىنمەن جالعاسادى.
