17:47, 29 - قاڭتار 2016 | GMT +5
قىتايدا جالقاۋ شەنەۋنىكتەر قاتاڭ جازاعا تارتىلدى
استانا. قازاقپارات - قىتاي ۇكىمەتى جۇمىستا جالقاۋلىق كورسەتكەن نەمەسە تيىمسىزدىك تانىتقان مىڭنان اسا شەنەۋنىكتى جۇمىستان شىعارۋ ارقىلى جازالادى. بۇل تۋرالى «شينحۋا» دەرەگى بويىنشا ras.kz حابارلادى.
«ۇكىمەت ىشكى تەكسەرىستەن كەيىن جۇمىستا جالقاۋلىق كورسەتكەن جانە ءتيىمسىز جۇمىس جاساعان 1148 شەنەۋنىكتى جازالادى» ، - دەلىنگەن مەملەكەتتىك كەڭەس مالىمدەمەسىندە.
ءمالىم بولعانداي، ءتارتىپ بۇزۋشىلىق ءبىلىم بەرۋ، الەۋمەتتىك قاۋىپسىزدىك جانە دەنساۋلىق ساقتاۋ سالالارىندا كوبىرەك ورىن العان. ءتارتىپ بۇزۋشىلىقتار ساناتىندا ءىرى جوبالاردى كورسەتىلگەن مەرزىمىندە ورىنداماۋ، قاۋىپسىزدىك ماسەلەلەرىنە جاۋاپسىز قاراۋ بار.
تەكسەرۋ وتكەن جىلدىڭ ورتاسىندا جۇرگىزىلگەن. ونىڭ قىتاي كوممۋنيستىك پارتياسىنىڭ باستى جەمقورلىققا قارسى ورگانى - ءتارتىپ جونىندەگى ورتالىق كوميتەت جاساپ جۇرگەن تەكسەرۋ جۇمىستارىنا قاتىسى جوق.
