تەڭگەنى ەركىنە جىبەرمەي ۇستاپ تۇرساق، مەملەكەت تە، حالىق تا الدەقايدا كەدەيلەنىپ كەتەر ەدى - ەلباسى
بۇگىن استانادا ءوتىپ جاتقان «نۇر وتان» ساياسي پارتياسىنىڭ كەزەكتەن تىس XVII سەزىندە پارتيا ءتوراعاسى، ەلباسى نۇرسۇلتان نازاربايەۆ وسىلاي مالىمدەدى.
«ءبىز الەمنىڭ بارلىق وڭىرىندە باعانىڭ قۇلدىراۋىن بايقاپ وتىرمىز. بۇل تۇتاستاي حالىقارالىق ساۋدا سيپاتىنا اسەرىن تيگىزەدى. ەكىنشىدەن، جالپىلاما العاندا الەمدىك قارجى جۇيەسىنىڭ قۇبىلمالىلىعى - داعدارىسقا ەڭ ۇلكەن اسەر بەرىپ وتىر. الەمنىڭ كوپتەگەن ۆاليۋتاسى ورنىقسىز، دەۆالۆاتسياعا ۇشىراپ جاتىر. بۇل ۇلتتىق جۇيەلەردىڭ جاھاندىق ەكونوميكا ترەندتەرىنە رەاكسياسى»، - دەدى ەلباسى.
وسىعان بايلانىستى ەلباسى جاقىندا ورىن العان ا ق ش پەن قىتايداعى قور نارىقتارىنىڭ قۇلدىراۋىن ەسكە سالىپ، وسى وقيعانىڭ الەمدىك كومپانيالارعا 194 ميلليارد دوللار زالال كەلتىرگەنىن اتاپ ءوتتى.
«ساراپشىلاردىڭ ەسەپتەۋىنشە، وتكەن بەس جىل ىشىندە ادامزاتتىڭ تەڭ جارتىسى 1 تريلليون دوللارعا كەدەيلەنگەن. بۇل قازاقستان ءۇشىن نەنى بىلدىرەدى؟ ەڭ بىرىنشىدەن، ءبىرقاتار سىرتقى ينۆەستيتسيالىق كوزدەر جابىلدى. الەمدىك ينۆەستورلار ساقتانا باستادى. ال تەڭگە ديناميكاسىنىڭ تومەندەۋى - بۇل الەمدىك ەكونوميكالىق كونەكتۋرامەن بايلانىستى وبەكتيۆتى پروتسەس بولاتىن»، - دەدى پارتيا ءتوراعاسى.
بۇل رەتتە مەملەكەت باسشىسى ەگەر قاعيداتتى تۇردە تەڭگەنى ەركىندىككە جىبەرمەي، قولمەن رەتتەۋدى ۇستاپ تۇرعاندا نە بولاتىنىن دا ءتۇسىندىرىپ بەردى. ەلباسىنىڭ ايتۋىنشا، ۇلتتىق قور قاراجاتى ەسەبىنەن تەڭگەنى قولداۋدان باس تارتپايتىن بولساق، قازاقستان مەملەكەتى مەن حالقى الدەقايدا كەدەيلەنىپ كەتەتىن ەدى. «قارجىلىق جۇيە قۇلدىراپ، ءوندىرىس جابىلاتىن ەدى. جالاقى تولەۋدەن قالىپ، شاعىن كاسىپورىندار قۇريتىن ەدى. جۇمىسسىزدىق بەلەڭ الىپ، ينفلياتسيا شارىقتايتىن ەدى. ال بۇدان قازاقستاندىقتار باييدى ما؟ جوق. رۋبل قۇنسىزدانىپ ەدى، رەسەيدىڭ ارزان تاۋارلارى قازاقستاندى باسىپ قالدى. ءبىز 2-3 ايدىڭ ىشىندە كورشى ەلدەن 60 مىڭعا تارتا كولىك كىرگىزدىك، ونى وزىمىزدەن دە ساتىپ الۋعا بولاتىن ەدى. تەوريالىق تۇرعىدان الساق، مەن 1 دوللاردى 1 تەڭگە ەتەتىندەي شەشىم قابىلداي الامىن. بۇنى ىستەۋگە دە بولادى. ءبىر جىلدارى سولاي دا بولعان. الايدا، ول بارلىق جاعىنان تۇمشالانعان زاماندا بولىپ ەدى»، - دەدى ن. نازاربايەۆ.
اۆتور: قانات مامەتقازى ۇلى
