قانداي قيىن جاعداي بولسا دا حالىققا بەرگەن ۋادەمىزدى ورىندايمىز - ن. نازاربايەۆ
«قۇرىلىس سالاسىنداعى رۇقسات قۇجاتتارىن بەرۋ مەرزىمى تۇبەگەيلى قىسقارتىلدى. بۇكىل الەمدە بايقالىپ وتىرعان جاھاندىق داعدارىسقا قاراماستان ءبىز حالىققا الەۋمەتتىك قولداۋ كورسەتۋدى جالعاستىرىپ وتىرمىز. وزدەرىڭىزدە بىلەتىندەي، مەنىڭ تاپسىرماممەن اعىمداعى جىلدىڭ 1- قاڭتارىنان دەنساۋلىق سالاسى قىزمەتكەرلەرىنىڭ جالاقىسى ورتاشا 28 پايىزعا، ءبىلىم سالاسىندا 29 پايىزعا دەيىن، الەۋمەتتىك قورعاۋ 40 پايىزعا دەيىن ءوستى. سونىمەن قاتار جىل باسىنان مۇگەدەكتىك بويىنشا بەرىلەتىن الەۋمەتتىك جاردەماقى، اسىراۋشىسىنان ايىرىلعاندارعا بەرىلەتىن جاردەماقى جانە شاكىرتاقى كولەمى 25 پايىزعا كوتەرىلدى. قاڭتار كەلدى. بۇل ادامدارعا جەتكەن دە شىعار دەپ ويلايمىن. سولاي ما؟ قۇتتىقتايمىن»، - دەدى ق ر پرەزيدەنتى.
ەلباسى جىل باسىنان باستاپ ىنتىماقتى زەينەتاقى ينفلياتسيادان الدىن الا 2 پايىزعا يندەكساتسيالانعانىن، مەملەكەتتىك قىزمەتشىلەردىڭ جالاقىسى 30 پايىزعا وسكەنىن ايتتى.
«وسىلايشا، بىزگە دە اسەرى ءتيىپ وتىرعان الەمدىك داعدارىسقا، ەكسپورتتىق ونىمدەرىمىزدىڭ باعاسىنىڭ قۇلدىراۋىنا، بيۋدجەت ءوز كىرىسىنىڭ شامامەن 40 پايىزىن الماۋىنا قاراماستان حالىققا بەرگەن ۋادەمىزدى ورىندايمىز»، - دەدى ن. نازاربايەۆ.
اۆتور: مارلان جيەمباي
