قازاق بوكىسشىسىمەن ونىڭ قارسىلاسى تيتۋلدىق جەكپە-جەكتىڭ الدىندا سالماق ولشەۋ راسىمىنەن ءوتتى

استانا. قازاقپارات - قازاقستاندىق بوكسشى جانقوش تۇراروۆ پەن برازيليالىق حاوكيم كارنەيرو تيتۋلدىق جەكپە-جەكتىڭ الدىندا سالماق ولشەۋ راسىمىنەن ءوتتى.

بۇل تۋرالى قازاقستاندىقتىڭ ينستاگرام الەۋمەتتىك جەلىسىندەگى اككاۋنتىندا حابارلاندى.

بۇعان دەيىن 25 جاستاعى ج. تۇراروۆ پەن 28 جاستاعى ح. كارنەيرونىڭ اراسىنداعى جەكپە-جەك 29- قاڭتاردا نيۋ-يوركتە وتەتىنى بەلگىلى بولعان. National Boxing Association (NBA)  نۇسقاسى بويىنشا الەم چەمپيونىنىڭ بوس بەلدىگى ءۇشىن 12 راۋندتىق جەكپە-جەك جارتىلاي ورتاشا سالماق ساناتىندا (147 فۋنت - 66,7 كەلىگە دەيىن) وتپەك.

قازاقستاندىق بوكسشىنىڭ ەسەبىندە 17 جەكپە-جەك بار، بىردە-ءبىر رەت جەڭىلمەگەن، سونىڭ 12 سىندە نوكاۋتپەن جەڭىسكە قول جەتكىزگەن. برازيليالىقتىڭ ەسەبىندە بارلىعى 28 جەكپە-جەك، 22 جەڭىس بار، سونىڭ 20 سىن ۋاقىتىنان بۇرىن اياقتاعان، التى رەت جەڭىلگەن.