وزبەك كومانداسىنداعى قازاق بوكسشىسى بۇكىل الەمدىك جارىسقا دايىن
بۇكىل الەمدىك بوكس سەرياسىنىڭ التىنشى ماۋسىمىندا «استانا ارلاندارى» مەن «وزبەك جولبارىستارى» ءبىر توپقا ءتۇستى. ەكەۋى دە الەۋەتتى كوماندا. قوس كلۋب بوكسشىلارى دا جوبانى جەڭىسپەن باستادى.
قالاي دەسەك تە «ورتا ازيا دەربيى» تارتىستى وتەتىن سىڭايلى. «Uzbek tigers» كومانداسىنىڭ قۇرامىندا الەم بىرىنشىلىگىنىڭ فيناليستەرى مەن جۇلدەگەرلەرى دە بار.
ءبىزدى قىزىقتىرىپ وتىرعان مىنا جاعداي.
وزبەكستان قۇراماسىنىڭ ساپىنا الەم بىرىنشىلىگىنىڭ جانە ازيا چەمپيوناتىنىڭ جۇلدەگەرى ەلنۇر ءابدىرايىموۆ تا قوسىلدى. قانداسىمىز الداعى كۇنى «ارلاندارعا» قارسىلاس اتانۋى ابدەن مۇمكىن.
وزبەك باپكەرلەرىنىڭ سەنىمىنەن شىعىپ جۇرگەن قازاق بوكسشىسى جاڭا جوبادا جۇدىرىقتاسۋعا دايىن. مۇنى تىلشىمىزگە بەرگەن سۇحباتىندا ايتتى.
«كوماندامەن بىرگە كۋبادا ون ءتورت كۇن جاتتىعۋ جيىنىن وتكىزدىك. 5- اقپاندا «باكۋ وتتارى» كومانداسىنا قارسى ايقاسقا شىعامىن. قارسىلاسىم ءالى بەلگىسىز»، - دەيدى ەلنۇر.
جات جۇرتتا ءجۇرىپ-اق، مىقتىلىعىن مويىنداتقان ەلنۇردىكى ەرلىك. كاتاردا وتكەن الەم چەمپيوناتىندا وليمپيادا جولداماسىن يەلەنگەنى دە كوپشىلىككە ءمالىم.
بۇكىل الەمدىك بوكس سەرياسىندا بۇعان دەيىن ۇرىمجىلىك قازاق سپورتشىسى سەرىك تولەۋتاي (قىتاي ايداھارلارى) باق سىناعانىن بىلەمىز. اتتەگەن-ايى، جوباعا ىرىكتەۋ تۋرنيرىندە سەرىك تولەۋتاي دا، ايبىن قانات ۇلى دا باپكەرلەردىڭ كوزىنە تۇسە العان جوق.
