08:39, 29 - قاڭتار 2016 | GMT +5
ۆەنەسۋەلا مەن يران ب ۇ ۇ باس اسسامبلەياسىنداعى داۋىس بەرۋ قۇقىن قايتارىپ الدى
استانا. قازاقپارات - ۆەنەسۋەلا، يران جانە تاعى 5 ەل دۇنيەجۇزىلىك ۇيىمنىڭ بيۋدجەتىنە بەرەشەكتەرىن وتەپ، ب ۇ ۇ باس اسسامبلەياسىنداعى داۋىس بەرۋ قۇقىعىن قايتارىپ الدى.
بۇل تۋرالى ب ۇ ۇ باس حاتشىسىنىڭ رەسمي وكىلى ستەفان ديۋجارريك ءمالىم ەتتى.
«تولەم باحرەين، بۋرۋندي، دومينيكان رەسپۋبليكاسى، يران يسلام رەسپۋبليكاسى، مالي، سەنت-ۆينسەنت جانە گرەنادين، سونداي-اق ۆەنەسۋەلادان ءتۇستى»، - دەپ اتاپ ءوتتى ول.
18- قاڭتاردا باس حاتشى پان گي مۋن باس اسسامبلەياعا حات جولداپ، بەرەشەكتەرىنە بايلانىستى 10 ەل داۋىس بەرۋ قۇقىعىنان ايىرىلعاندىعىمەن حاباردار ەتكەن ەدى.
ستەفان ديۋجارريكتىڭ جۋرناليستەرگە حابارلاۋىنشا، 2016-جىلدىڭ جارناسىن قازىردىڭ وزىندە 20 مەملەكەت تولەپ تە قويعان.
