بيىلعى قىستا شىمبۇلاق پەن مەدەۋگە كەلۋشىلەر سانى رەكورد ورناتتى

الماتى. قازاقپارات- «شىمبۇلاق» تاۋ- شاڭعىلى شيپاجايى مەن «مەدەۋ» مۇز ايدىنىنا كەلۋشىلەر سانى رەكوردتىق كورسەتكىشكە جەتتى.

بۇل تۋرالى بۇگىن الماتى اكىمدىگىندە ۋنيۆەرسيادا ويىندارىنا دايىندىق بارىسىن تالقىلاۋ بويىنشا وتكەن جيىن بارىسىندا «Chimbulak Development» ج ش س باس ديرەكتورى ەرجان ەركىنبايەۆ حابارلادى.

«مەدەۋ» مۇز ايدىنىنا بيىلعى قىسقى مۋسىمدا كۇنى بۇگىنگە دەيىن 260 مىڭنان استام ادام كەلدى. بۇل وتكەن جىلعى بۇكىل ماۋسىمداعى كورسەتكىشتەن 60 مىڭ ادامعا ارتىق. ال شىمبۇلاقتا سىرعاناۋشىلار سانى 20 پايىزعا ءوستى. وسى ماۋسىم باستالعالى، كۇنى بۇگىنگە دەيىن شىمبۇلاققا 90 مىڭ سىرعاناۋشى مەن 90 مىڭ دەمالۋشىلار كەلدى. سونداي-اق، ءوز اۆتوكولىگىمەن كەلەتىندەر دە بار»، - دەدى ە. ەركىنبايەۆ.

سونىمەن قاتار، ونىڭ ايتۋىنشا، شىمبۇلاققا وتكەن جىلعى ماۋسىمداعى كۇندەردىڭ بىرىندە ءبىر كۇندە - 7 مىڭ ادام كەلىپتى. ال بيىلعى ماۋسىمدا رەكوردتىق كۇندەردىڭ بىرىندە - 10 مىڭنان استام ادام كەلگەن. وتكەن جىلى مەدەۋگە ءبىر كۇندە 7 مىڭ ادام كەلسە، بيىلعى رەكورد - 13 مىڭعا جۋىق ادام.

«بۇل ساندارعا قاراپ، قالا تۇرعىندارى اراسىندا تابيعات اياسىندا بەلسەندى دەمالۋ مادەنيەتى وتە تانىمال بولا باستاعانىن كورۋگە بولادى. ادامدار تەك سىرعاناۋ ءۇشىن ەمەس، ءجاي سەرۋەندەۋ جانە تازا اۋامەن تىنىستاۋ ءۇشىن دە كەلەدى. بۇل تۇرعىدا ترەكينگتىڭ (جاياۋ تۋريزم) الەۋەتى جوعارى. ونىڭ ۇستىنە، كۇردەلى ەكونوميكالىق جاعدايعا قاراماستان، ءبىز ءتاريفتى قىمباتتاتقان جوقپىز جانە كەلۋشىلەرگە ءار ءتۇرلى جەڭىلدىكتەر ۇسىنىپ وتىرمىز. سونداي-اق، بىزدە وسى كەشەندەردە جازدا دەمالۋ ءۇردىسىن قالىپتاستىرۋ بويىنشا جۇمىستار جۇرگىزىلىپ جاتىر»، - دەدى «Chimbulak Development» جەتەكشىسى.

اۆتور: جاپپاربەرگەن ايبوتا