الماتىنىڭ حايۋاناتتار باعىندا شيمپانزەنىڭ سۋرەت كورمەسى وتەدى - فوتو
زووباق قىزمەتكەرلەرىنىڭ ايتۋىنشا، توميريس دەپ اتالاتىن شيمپانزەنىڭ سۋرەت سالۋعا دەگەن قابىلەتى مەن قۇمارلىعى اياق استىنان بەلگىلى بولعان جانە بۇل بارلىق قىزمەتكەرلەردى تاڭ قالدىرعان.
جاڭا جىل الدىندا وسى باقتاعى «جاس تابيعات زەرتتەۋشىلەرى» كلۋبىنىڭ جەتەكشىسى ەلەنا ۋدارتسيەۆا شاكىرتتەرىمەن ادەتتەگىدەي ءدارىس وتكىزىپتى. بۇل جولى ساباق پريماتتار (جوعارى ساتىداعى ءسۇت قورەكتىلەر وتريادى) سەكسياسىندا جۇرگەن. ساباق بارىسىندا جاس تابيعات زەرتتەۋشىلەرىنىڭ ءبىرى - 9-سىنىپ وقۋشىسى ءالينا دەمەنكوۆا وزىمەن بىرگە الىپ كەلگەن البومىنا ءوزىنىڭ كورگەندەرى بويىنشا باياۋمەن سۋرەت سالا باستايدى. كەنەت، شيمپانزە سۋرەت سالۋ ىسىنە قاتتى قىزىعۋشىلىق تانىتا باستاعان.
مۇنى بايقاعان سەكسيا مەڭگەرۋشىسى شولپان ابدىبەكوۆا وعان قاعاز بەن قالام ۇسىنادى. توميريس سۋرەت سالا باستايدى. دالىرەك، ءالينانىڭ جاساعان ءاربىر قيمىلىن قالت جىبەرمەي قايتالايدى.
بۇدان كەيىنگى كۇندەرى ءبۇل ۇدەرىس جالعاسىن تاپقان. ءالينا توردىڭ قاسىنا كەلىپ، سۋرەت سالۋعا كىرىسەدى. ال شولپان تورعا كىرىپ، شيمپانزەگە بور، بوياۋ، قىلقالام جانە قاعاز ۇسىنادى. ال ول سۋرەت سالۋعا كىرىسەدى.
ءبىر ايتا كەتەرلىگى، ونىڭ سۋرەت سالۋعا دەگەن ىنتاسىن وياتۋ وڭاي ەمەس ەكەن. ول الدىمەن شولپانمەن امانداسىپ العان سوڭ، مىندەتتى تۇردە ءدامدى سىيلىقتارعا تويىپ الۋى ءتيىس. سودان كەيىن ءارى-بەرى سەندەلىپ ءبىراز جۇرگەن سوڭ بارىپ، سۋرەت سالۋعا كىرىسەدى.
«ونىڭ باسىندا قانداي ۇدەرىستەر ءجۇرىپ جاتقانى بەلگىسىز. قاعازعا قانداي سۋرەت سالعىسى كەلەتىنى دە تۇسىنىكسىز. ءبىراق، مەنىڭ جيىرما جىلدىق جۇمىس تاجىريبەمدە مۇنداي جاعدايدى مەن ءبىرىنشى رەت كورۋىم»، - دەيدى شولپان ابدىبەكوۆا.
شيمپانزە كەيدە سۋرەتتى اسا ءبىر ىجداحاتپەن سالادى ەكەن، ال كەيدە ءبارىن تاستاپ، وزىمەن-ءوزى بولىپ، ءارى-بەرى سەندەلىپ جۇرەدى دە قويادى. كوپ ۇزاماي، ونىڭ «جۇمىستارى» اجەپتەۋىر جينالعان سوڭ، كورمە وتكىزۋ ۇيعارىلىپتى.
«كورمە 8- اقپاندا اشىلادى. بۇل كۇنى شىعىس كۇنتىزبەسى بويىنشا وتتى مەشىننىڭ جىلى باستالادى. ءبىر وكىنىشتىسى، شيمپانزە سۋرەت سالىنعان قاعازدى قولعا بەرە سالمايدى. ءتىپتى ۇستاتپايدى. ول ونى مىندەتتى تۇردە توردىڭ تەسىگىنەن وتكىزىپ تاستاعاندى ۇناتادى. ارينە، سۋرەت ازداپ ۋماجدالىپ قالادى. امال نەشىك، بۇل ونىڭ وزىندىك «قولتاڭباسى» بولسا كەرەك»، - دەدى ش. ابدىبەكوۆا.
ەسكەرتە كەتەلىك، شيمپانزە اسىرەسە «ۇلكەن» سىيلىقتار: الما مەن شابدالى شىرىنىن، سونداي-اق الما، بانان سەكىلدى جەمىستەردى العاندا سۋرەتتەردى بىرىنەن-سوڭ ءبىرىن ەرەكشە شابىتپەن سالىپ تاستايدى.
كورمە تاڭعى ساعات 10:00 دەن 16:00 گە دەيىن جۇمىس ىستەيدى.
كورمە جۇمىسى 19- اقپانعا دەيىن جالعاسادى.
