ءبىر مينۋتتا قاقپاسىنا ءۇش گول وتكىزىپ العان استانانىڭ «بارىسى» بۋلليتتە جەڭىسكە جەتتى - فوتو

استانا. قازاقپارات - قۇرلىقتىق حوككەي ليگاسى تۇراقتى چەمپيوناتىنىڭ ءوز ايدىنىنداعى سوڭعى كەزدەسۋىندە استانانىڭ «بارىسى» چەليابىنىڭ «تراكتورىن» قابىلداپ، بۋلليت سەرياسىندا جەڭىسكە جەتىپ، ماڭىزدى ەكى ۇپايدى ەنشىلەدى.

ماتچتى قارقىندى باستاعان استانالىقتار 3^- ء^شى مينۋتتا- اق سان باسىمدىلىعىن پايدالانىپ، كوماندا كاپيتانى برەندون بوچەنسكيدىڭ پاسىنان كەيىن نايدجەل دوۋس ەسەپ اشتى. 12-مينۋتتا «تراكتوردىڭ» قاقپاسىنا بۋلليت بەلگىلەنىپ، ونى رومان ستارچەنكو ءدال ورىنداپ، ەسەپتى 2:0 گە جەتكىزدى. 16-مينۋتتا قوناقتاردان اندرەي پوپوۆ مەرگەندىگىمەن كوزگە تۇسكەنىمەن، ەكى مينۋتتان كەيىن «بارىستىڭ» قورعاۋشىسى رومان ساۆچەنكو ەسەپتى قايتادان ۇلعايتتى.

ويىننىڭ ەكىنشى كەزەڭى «بارىس» ءۇشىن اسا ءساتسىز باستالعانى سونداي، 22- مينۋتتا ايدىن يەلەرىنىڭ قاقپاسىنا بىردەن ءۇش گول سوعىلدى. اۋەلى سلوۆاكيالىق لەگيونەر يان لاتسو قورعاعان قاقپاعا انتون گلينكين، سودان كەيىن مارتين رۋجيچكا قاتارىنان ەكى شايبا ەنگىزدى. بۇدان كەيىن استانالىقتاردىڭ باس باپكەرى اندرەي نازاروۆتىڭ شەشىمىمەن قاقپانى قورعاۋعا شىققان پاۆەل پولۋەكتوۆ ويىنعا كىرىسپەي جاتىپ، ماكسيم ياكۋتسەنيادان تاعى ءبىر گولدى وتكىزىپ الدى. ءسويتىپ ءبىر مينۋتتا ءۇش گول سوققان «تراكتور» 4:3 ەسەبىمەن العا شىقتى.

ءۇشىنشى كەزەڭدە عانا «بارىس» اۋپىرىمدەپ 50-مينۋتتا داستين بويدتىڭ ارقاسىندا تارازى باسىن تەڭەستىرە الدى. ماتچ 4:4 بولىپ اياقتالعاننان كەيىن بەلگىلەنگەن وۆەرتايم ەشقانداي ناتيجە بەرمەدى. ال بۋلليت سەرياسىندا پاۆەل پولۋەكتوۆ «تراكتور» ءۇمىت ارتقان ءۇش ويىنشىنىڭ دا سوققىسىن قايتارىپ، ەرلىك جاسادى. ال «بارىس» ساپىنان مايك لاندين مەرگەندىك تانىتىپ، شەشۋشى گولدى سالدى.

سونىمەن، «بارىس» بۋلليت سەرياسىندا 5:4 ەسەبىمەن ۇتىپ، وسى ماۋسىمداعى 27-جەڭىسىنە قول جەتكىزدى. اندرەي نازاروۆتىڭ شاكىرتتەرى 55 ويىننان كەيىن 80 ۇپاي جيناپ، شىعىس كونفەرەنتسياسىندا بۇرىنعىشا پلەي-وفف باسەكەلەرىنە شىعۋعا مۇمكىندىك بەرەتىن جەتىنشى ورىندا كەلەدى. ايتسە دە وسى تۋردا ەكاتەرينبۋرگتەگى ءوز ايدىنىندا ۋفانىڭ «سالاۆات يۋلايەۆ» كومانداسىن وۆەرتايمدا 3:2 ەسەبىمەن ۇتقان «اۆتوموبيليست» 54 كەزدەسۋدەن سوڭ 79 ۇپايمەن «بارىستى» وكشەلەپ تۇر ءارى ونىڭ ءبىر ويىنى كەم، ياعني مۇمكىندىگى جوعارى.

ونىڭ ۇستىنە توعىزىنشى ساتىداعى «نەفتەحيميك» (نيجنەكامسك) كومانداسىنىڭ 54 ويىننان 78 ۇپايى بار. دەمەك، ول دا «بارىستى» قۋىپ جەتە الادى. سوڭعى كەزدە قارقىندى ويناپ جۇرگەن «نەفتەحيميك» ومبىدا كوش باسىنداعى «اۆانگاردتى» 4:1 ەسەبىمەن تىزە بۇكتىرىپ، كەزەكتى ءۇش ۇپايىنا يە بولدى.

استانالىقتار 1- اقپان كۇنى ۋفادا شىعىس كونفەرەنتسياسىندا 88 ۇپايمەن ءتورتىنشى ورىندا تۇرعان «سالاۆات يۋلايەۆپەن» «ۋفا-ارەنا» ايدىنىنا شىعادى. وسىعان دەيىن قاتارىنان ءتورت مارتە ۇتىلعان ۋفالىق كلۋبتىڭ دا شەگىنەر جەرى جوق. ونىڭ الدىندا، 29- قاڭتار كۇنى ۋفالىقتار سول ايدىندا «نەفتەحيميكتىڭ» شاماسىن بايقاپ كورەدى. سودان كەيىن «بارىس» تاعى ءتورت ويىنىن سىرت ايدىندا وتكىزەدى، ياعني ەندى ۇپاي جيناۋ ۇلكەن كۇشكە تۇسپەك. تۇراقتى چەمپيونات 18- اقپان كۇنى مارەگە جەتىپ، پلەي-وفف باسەكەسىنە جولداما العان كوماندالار تولىقتاي بەلگىلى بولادى.