الماتىدا مۇز ارەناسى مەن مۇز سارايىنىڭ قۇرىلىسى ۋاقىت كەستەسىنەن الدا كەلە جاتىر - فوتو
2017 -جىلعى قىسقى ۋنيۆەرسياداعا دايىندالۋ جانە ونى وتكىزۋ بويىنشا ديرەكسيا باسشىسىنىڭ ورىنباسارى نۇرگەلدى ءابجاپپاروۆ مۇز ارەناسى مەن مۇز سارايىنىڭ قۇرىلىس جۇمىستارى ۋاقىت كەستەسىنەن 40 كۇن الدا جۇرگىزىلىپ جاتقاندىعىن ايتتى.
«ۇستىمىزدەگى جىلدىڭ 22- ناۋرىزىندا مەدەۋ اۋدانىنداعى 3000 ورىندىق مۇز ارەناسىنىڭ جاتتىعۋ ايدىنى دايىن بولادى، ال 6- شىلدەدە نەگىزگى ارەنا مەن اكىمشىلىك عيماراتتىڭ قۇرىلىسى اياقتالىپ، نىساننىڭ اينالاسى اباتتاندىرىلادى»، - دەدى ن. ءابجاپپاروۆ.
3 مىڭ ورىندىق نەگىزگى ارەنادا مەدياورتالىق، مەديتسينالىق پۋنكت، كافە جانە تورەشىلەر ايماعى ورناتىلادى. ال 300 ورىندىق كىشى ارەنادا كيىم شەشەتىن ورىن، ترەناجەرلىك زال، كەڭسەلەر مەن باسقا دا ورىندار بەلگىلەنگەن.
ۋنيۆەرسيادا بارىسىندا مۇز ارەناسىندا حوككەيدەن ەرلەر كوماندالارى اراسىندا جارىستار وتەدى.
«ال 12 مىڭ ورىندىق مۇز ساريىنىڭ اكىمشىلىك عيماراتىنىڭ، وسىنداعى باسسەين مەن جاتتىعۋ مۇز ايدىنىنىڭ قۇرىلىس- مونتاج جۇمىستارى تولىق اياقتالدى. نىساننىڭ نەگىزگى بلوگى 2016 -جىلدىڭ 9-شى مامىرىندا پايدالانۋعا بەرىلەدى، ال ونىڭ اينالاسىن اباتتاندىرۋ جۇمىستارى 6- شىلدەدە اياقتالادى»، - دەدى ديرەكسيا وكىلى.
مۇز سارايىندا ۋنيۆەرسيادانىڭ اشىلۋ جانە جابىلۋ سالتاناتى، سونداي-اق، مانەرلەپ سىرعاناۋدان جارىستار وتەدى.
ال 475 ورىندىق كىشى ارەنادا قىسقى ۋنيۆەرسيادا بارىسىندا كەرلينگتەن جارىس وتەدى دەپ كۇتىلۋدە. ال جارىستان باسقا ۋاقىتتاردا سپورتشىلار بۇل ەكى ارەنادا جوعارى دەڭگەيدە وزدەرىنىڭ وقۋ- جاتتىعۋ جيىندارىن وتكىزىپ تۇراتىن بولادى. ويتكەنى، مۇندا مۇز ايدىندارىمەن قوسا، بوكس، كۇرەس، ۇستەل تەننيسى، حورەوگرافيا، اكروباتيكا جانە ەكى ترەناجەر زالدارى، مەديتسينالىق وڭالتاۋ ورتالىعى جۇمىس ىستەيدى.
ول سونىمەن قاتار، ۋنيۆەرسيادا بيۋدجەتى 17 ميلليارد تەڭگەگە دەيىن وڭتايلاندىرىلعاندىعىن ايتتى.
«بۇل نىساندار، ياعني مۇز سارايى مەن مەدەۋ اۋدانىندا سالىنىپ جاتقان 3 مىڭ ورىندىق مۇز ارەناسى ۆولەيبول، باسكەتبول، ميني- فۋتبول جانە باسقا دا سپورتتىق جارىستاردى، سونداي-اق كەڭ كولەمدى مادەني شارالار وتكىزە بەرۋگە بولاتىنداي ەتىپ جوبالانعان»، - دەدى الماتى ق. سپورت قۇرىلىمدارى ديرەكسياسىنىڭ جەتەكشىسى سەرگەي اپەنكو.
بۇعان دەيىن حابارلاعانىمىزداي، ۋنيۆەرسيادانىڭ بارلىق سپورت نىساندارى 2016 -جىلدىڭ 30- تامىزىندا پايدالانۋعا بەرىلەدى.
اۆتور: جاپپاربەرگەن ايبوتا
