جازۋشى اكىم تارازي ۇلتتىق كىتاپحاناعا مىڭعا جۋىق كىتاپ تابىس ەتتى

استانا. قازاقپارات - جازۋشى، مەملەكەتتىك سىيلىقتىڭ يەگەرى، دراماتۋرگ اكىم تارازي بۇگىن ۇلتتىق اكادەميالىق كىتاپحاناعا ءوزىنىڭ جازعان كىتاپتارى، سونداي-اق، جەكە كىتاپحاناسىندا جيناعان وتە قۇندى كىتاپتاردى تارتۋ ەتتى.

«وزىمدە بارى 4 مىڭ كىتاپ ەدى، بۇگىن مىڭعا جۋىعىن وسى كىتاپحاناعا تاپسىردىم»، - دەيدى اكىم اعانىڭ ءوزى.

جالپى، اكىم تارازي ستۋدەنت كەزىنەن-اق كىتاپ جيناي باستاعان. جازۋشى كوركەم ادەبيەتتى ەرەكشە جاقسى كورەدى، سونداي-اق، تاريحي كوركەم شىعارمالاردى دا جيناعان. بۇگىن ءومىر بويى جيناعان كىتاپتارىنان ىرىكتەپ، ۇلتتىق اكادەميالىق كىتاپحاناعا 979 كىتاپتى سىيعا تارتۋ ەتتى.

«وقى، وقى جانە وقى» دەگەن ارداقتى پايعامبارىمىز مۇحاممەدتىڭ وسيەتى. كەڭەس زامانىندا ونى لەنيننىڭ ءسوزى دەپ بۇرمالادى. شىن مانىندە، مۇحاممەد پايعامبارىمىزدىڭ بىزگە وسيەت ەتكەنى - وقۋ، ءبىلۋ. جاستارعا ايتارىم دا وسى - جالىقپاي وقىڭدار. مەن تولستويدىڭ «اننا كارەنيناسىن» ەكى رەت، «ۆوينا ي مير» كىتابىن ەكى رەت قايتالاپ وقىدىم. وقىعان سايىن قابىلداۋ وزگەشە بولادى»، - دەيدى اكىم تارازي.

 اكىم تارازيدىڭ ۇلتتىق كىتاپحانا تاپسىرعان كىتاپتارىنىڭ اراسىندا ءوزى جازعان «مۇستافا شوقاي»، «ماحاببات جىرى»، «قورقاۋ جۇلدىز» سياقتى روماندارى بار.

اكىم تارازي «جازا» اتتى اتاقتى رومانى ءۇشىن 1989 -جىلى «ق ر مەملەكەتتىك سىيلىعىنىڭ يەگەرى» اتانعان. ال، 2011 -جىلى دراماتۋرگ «الەم ادەبيەتىن دامىتۋعا قوسقان ۇلەسى ءۇشىن» فرانس كافكا اتىنداعى حالىقارالىق ادەبي سىيلىقتىڭ لاۋرەاتى اتانعان.

اۆتور: كەنجەكەي توقتامۇرات قىزى