ءشامشىنىڭ «تامدى ارۋى» قاراعاندىدا تۇرادى

وزبەك جەرىندە قازاقتاردىڭ كوپ شوعىرلانعان بۇل - تامدى اۋدانى ەدى. ءتىلىن، ءدىنىن ۇمىتپاي، سالت-ءداستۇردى ساقتاپ، ونەرگە جاقىن مىڭداعان قازاق ءوسىپ، ونگەن مۇندا.

مىڭبۇلاقتىڭ تۋماسى اقسۇلۋ ەرمانوۆا ءشامشىنىڭ اۋىلدارىنا 1975 -جىلى كەلگەنىن ايتادى. ەلىنە اتى شىعىپ، ءانشى اتانعان ارۋ قازاق ەلىنەن كەلگەن اتاقتى سازگەرگە كلۋبتا (مادەنيەت ءۇيى) اندە شىرقاعانىن جاسىرمايدى.

«سول ۋاقىتتا ازانعى قۇستىڭ سايراعانىن، تۇيەنىڭ قابات-قابات ءوتىپ بارا جاتقانىن كورىپ، ناعىز قازاق وسى اۋىلدا ەكەن عوي. شاشى ۇزىن قىزدارى دا بار ەكەن دەپ، ءشامشى ءبىزدىڭ اۋىلعا تامسانا قاراعانى بار»، - دەيدى اقسۇلۋ اجەي.

سول كونسەرتتە اقسۇلۋ ەرمانوۆا ۇلتتىق كيىمىن كيىپ، شاشىنا ەكى بۇرىم قويىپ، «ەركەم-اي» ءانىن شىرقاپتى. توبىعىنا جەتكەن ءدال سول بۇرىمعا ءشامشىنىڭ كوزى تۇسكەن دەسەدى. كەش سوڭىندا كەلىنشەكتەردىڭ بىرىنەن اقسۇلۋدى شاقىرتقانىن دا اۋىلداستارى ايتادى.

ءبىراق، ول كەز بىرەۋدىڭ كەلىنى، جارى، ەكى بالانىڭ اناسى اقسۇلۋ كەزدەسۋگە بارماعان. ءبىراق، ءبىراز ۋاقىت وتكەن سوڭ، «مۇنداي كەرەمەتتەي ارۋلارى بار اۋىلعا ءان ارناماسام، سازگەرلىگىمە سىن شىعار» دەپ، «تامدى ارۋىن» جازىپتى.

سودان باستاپ، اقسۇلۋ اجەيدى بۇكىل وزبەك ەلىندە جۇرگەن قازاقتار «تامدى ارۋى» دەپ اتاپ كەتىپتى.

«ءبىزدىڭ اۋىل مۇڭبۇلاق دەسە، مىڭبۇلاق ەدى. 1001 -شى مەنىڭ قايىن ءسىڭىلىم. شىنى كەرەك وسى انگە كەزىندە ۇلكەن تارتىس بولدى. ءبىراق مەن ءوز قايىنسىڭىلىمە ارنالعانىنا سەنىمدىمىن. ويتكەنى ءشامشى بۇل قىزدى ارنايى شاقىردى بۇل بارمادى كەلىن عوي ەندى»، - دەيدى جەڭگەسى ۇلشا بادانبايەۆا.

ءشامشى ايتسا ايتقانداي، جاس كەزىندە اقسۇلۋ اجەي اققۇبا، سۇلۋ بولعانىن سۋرەتتەرىنەن دە كورۋگە بولادى. بەتىنە ءاجىم ءتۇسىپ، سامايى اعارسا دا، ءوزىنىڭ اسەم كەلبەتىن جوعالتپاپتى. قازىر «تامدى ارۋى» تەمىرتاۋ قالاسىندا تۇرادى.

«ولەڭ شىققان سوڭ دا مەن ەشكىمگە ايتقان ەمەسپىن. ادامدار ساعان شىقتى، ساعان ارنالدى دەگەندە دە جاسىرىپ ءجۇردىم. قويش، ماعان كەرەك ەمەس، ونسىزدا مەنىڭ ءان ايتاتىنىمدى حالقىم بىلەدى دەپ قاراپايىمدىلىققا باردىم»، - دەيدى اقسۇلۋ ەرمانوۆا.

جۇبايىنىڭ كوزى تىرىسىندە اقسۇلۋ اجەي «ءشامشىنىڭ بىردە-ءبىر ءانىن ورىنداماي ءوتتىم»، - دەيدى.

قازىر التى بالاسى، ون توعىز نەمەرە ءسۇيىپ وتىر. زەينەت جاسىندا بولسا دا، انشىلىك ونەرىن تاستاماي، تەمىرتاۋداعى «اجەلەر انسامبىلىنىڭ» مۇشەسى.

Stan.kz