قازاقستاندا تەڭگەمەن ساقتالاتىن دەپوزيت مولشەرى ازداپ ءوستى
ساراپشىلاردىڭ مالىمەتىنشە، 2015-جىلدىڭ شىلدە-قىركۇيەك ايلارىندا ۇلتتىق ۆاليۋتانىڭ قۇنسىزدانۋىنان كەيىن بولعان قىسقارتۋداردان سوڭ قازان-قاراشا ايلارىندا تەڭگەمەن ساقتالاتىن دەپوزيتتەردىڭ مولشەرى 1,3 پايىزعا وسكەن.
قاراشا ايىنىڭ سوڭىندا قازاقستاننىڭ ەكىنشى دەڭگەيلى بانكتەرىندەگى دەپوزيت مولشەرى جىل باسىنداعى كورسەتكىشكە جەتتى.
«2014-جىلى جەكە تۇلعالاردىڭ دەپوزيت مولشەرى تەڭگەنىڭ قۇنسىزدانۋىنىڭ كۇتىلۋىنەن تۇراقتى بولعان جوق. 2014-جىلى 11 اي ىشىندە جەكە تۇلعالار پورتفەلى 20,3 پايىز جوعالتتى. سونىمەن قاتار، قازاقستاندا جەكەلەگەن نارىقتاعى دوللارلاندىرۋ دەڭگەيى ءوسىپ جاتىر. ەگەر ءبىر جىل بۇرىن ۇلتتىق ۆاليۋتامەن ساقتالعان دەپوزيت 39 پايىزدى قۇراسا، 2015-جىلدىڭ اياعىندا ول 17 پايىزعا تومەندەپ، 22 پايىزدى قۇرادى»، - دەلىنگەن باسىلىم حابارلاماسىندا.
باسىلىمنىڭ مالىمەتىنشە، ەلىمىزدەگى التى بانكتە ديەۆالۆاتسياعا قاراماستان جاعداي تۇراقتانىپ، تەڭگەمەن ساقتالعان دەپوزيت مولشەرى ارتىپ جاتىر.
«تۇرعىن ۇي قۇرىلىس جيناق بانكى» كليەنتتەرىنىڭ دەپوزيت مولشەرى 49,1 ميلليارد تەڭگەدەن 288,1 ميلليارد تەڭگەگە وسكەن. بۇل جاعداي وسى بانككە قازاقستانداعى تەڭگەمەن ساقتالعان دەپوزيت سيگمەنتىندە ءوز ۇلەسىن 7 پايىزعا، ياعني 20,8 پايىزعا دەيىن ءوسىرىپ الۋعا مۇمكىندىك بەردى.
ەكىنشى ورىندا «قازكوم» تۇر. بۇل بانكتە تەڭگەمەن ساقتالعان دەپوزيت مولشەرى 20,6 ميلليارد تەڭگەگە ءوسىپ، 213,5 ميلليارد تەڭگەنى قۇراعان. وسى رەتتە «قازكومنىڭ» ۇلەسى 4,3 پايىزعا ءوسىپ، 15,4 پايىزدى قۇرادى.
